2233/2025-2026

Saitual, the 15th November, 2025: Vawiin khan DC Conference Hall, Saitualah tribal te hotu Bhagwan Birsa Munda piancham kum 150-na, Janjatiya Gaurav Diwas lawmna hun hman a ni a, District Bawrhsap Dr. Lalngura Tlau chu khuallian niin hun a hmanpui.

He hunah hian khuallian Dr. Lalngura Tlau chuan thu a sawi a, Janjatiya Gaurav Diwas hman a nih chhan te sawi fiahin, tribal te tana mi pawimawh em em, zalenna sualtu leh tribal te hotu, Bhagwan Birsa Munda piancham hriat reng nan a ni, a ti. Bawrhsap chuan Ministry of Tribal Affairs hnuaiah tribal te tan hmasawnna hna hrang hrang thawh thin a ni tih a sawi a, Saitual District-ah ngei pawh hmasawnna tam tak hmuh tur a awm tawh a ni, a ti.

Dr. Lalngura Tlau chuan Janjatiya Gaurav Diwas pual hian a thlawnin certificate leh aadhaar siam hna kalpui a nih thu a sawi a, hnathawktute inpekna chu fakawm a tih thu a sawi bawk. Bawrhsap chuan sawrkar hnathawkte chu khawtlang mipuite tana malsawmna thlen leh an hmasawnna tur ngaihtuah chu an tih tur a ni tih hre thar turin a chah a, an hnathawhna kawngah theih tawp chhuah zel turin a chah bawk a ni.

Ministry of Tribal Affairs huaihawtin Tribal Freedom Fighter Bhagwan Birsa Munda piancham vawi 150-na hriat reng nan Janjatya Gaurav Diwas chu 1st - 15th November 2025 chhung hian Saitual District-ah hman a ni a, vawiin hian a kharna hun hman a ni. Janjatya Gaurav Diwas pualin he hun chhung hian tribal te tana hmalakna kalpui niin, Saitual District khaw pathum (3), Ṭawizo, Sihfa, Lenchim khuaah te "Certificate & Aadhar free Camp" neih a ni a, mipuite chu a thlawn vekin certificate leh aadhaar te siam sak an ni.

Vawiin inkhawm hi Pu J. Lalawmpuia, SDC-in a kai hruai a, khuallian Saitual Bawrhsap Dr. Lalngura Tlau in thu a sawi bawk a ni.