2712/2025-2026

Saitual, the 17th December, 2025: Vawiin khan Zawlbuk, Keifang Venghlunah PHED, Saitual Watsan Division, District Panchayat Resource Centre leh Saitual Bawrhsap Multipurpose Centre hawnna inkhawm neih a ni a, Prof. Lalnilawma, Minister of State, bialtu MLA ni bawk chu khuallian niin a hawng nghal a ni.

He hunah hian Minister Prof. Lalnilawma chuan, thu a sawi a, Saitual District tana mel lung pawimawh tak ni turin PHED, Saitual Watsan Division, District Panchayat Resource Centre leh Saitual Bawrhsap Multipurpose Centre hawn a ni thei chu ropui a tih thu a sawi. Minister chuan sawrkar tharin Year of Consolidation a hman avangin PHED, Saitual Watsan Division chu hawn a ni thei lawk lo tih a sawi a, kumin financial year tharah Engineer-in-Chief leh PHED lama hotute nen tanghoa theih tawpa an nawr hnua hawn a ni thei ta chu lawmawm a tih thu a sawi.

Minister chuan PHED, Saitual Watsan Division office chu Saitual District mipuiten an chhawr ngei a beisei thu a sawi a, tui connection ti thar duh te pawhin Khawzawl pan ngai tawh loin mahni district-ah ngei an dil thei tawh dawn a, hei hian mipuite tan awlsamna a thlen dawn a ni, a ti. Prof. Lalnilawma chuan VC te chu tui connection nei thei lo mi harsate zawng chhuak turin a chah a, chuti ang mite chu MLA fund atanga puih a inhuam reng thu a sawi bawk. Minister chuan tui hna humhalh kawngah kalkhawmte chu theih tawp chhuah turin a fuih a, Saitual PHED a thawk turte pawh mi tinte tana dawr nuam tak ni tur leh tha taka hna thawk turin a fuih nghal bawk a ni.

Prof. Lalnilawma chuan KTP General Conference 2026 Saitual District-ina a thlen tur denchhenin UD&PA kaltlangin kawng hrang hrangah hmasawnna hna thawh mek a ni tih a tarlang a, Saitual District-in hma a sawn zel theih nan theih tawp an chhuah zel tur thu sawiin, Saitual Watsan Division, DPRC leh Saitual Bawrhsap Multipurpose Centre te chu Saitual District mipuiten an tangkaipui ngei theih nan a duhsakna a hlan nghal a ni.

PHED, Saitual Watsan Division-ah hian hmun danga thawk sa mi pali- Sr. EE, UDC, LDC leh IV Grade te dah a ni ang a, Sub-division pahnih- Ngopa Sub-division leh Saitual Sub-division a awm dawn a ni. Saitual DPRC Office building hi DC Complex-ah awmin, conference room 1, office room 3 leh toilet 6 te a awm a, hostel building-ah hian room 6, dormitory leh choka pakhat awmin, room tinah toilet dah vek a ni bawk. Saitual Bawrhsap Multipurpose Centre hi DC Complex-ah a awm a, mipa leh hmeichhia inthiarna tur awmin, stage zau tha tak a awm bawk a ni.

Vawiin inkhawm hi Saitual Bawrhsap, Dr. Lalngura Tlauin kai hruaiin, Pastor Thangchhuaka, PCI, Saitual chuan hunserh a hmang a, khuallian Minister Prof. Lalnilawma leh UD&PA Director Pu Jacob Lalawmpuia, Director te chuan thu an sawi. PHED atanga report hi Er. Zodinthari, E-in-C, PHED hnen atangin ngaihthlak a ni a, Pu LT Lalrinmawia, EE, Dte.of LAD, RD&AD chuan RD&AD atang report pein, P&PID report hi Pu Joseph Vanlalruata, AE, P&PID atanga ngaihthlak a ni bawk. Vawiin inkhawm hi Pu Lallawmawma, Addl. DC chuan lawmthu sawinain a khar a, Pi Zodingpuii, Secy, PHED, Pu Lalremsanga, Director, SIRD&PR te bakah sawrkar department hotute, khawtlang hruaitute leh NGO te an tel a ni.