4350/2025-2026

Saitual, the 9th February, 2026: Vawiin khan DC Conference Room, Saitualah District Coordination Committee for National Deworming Day (NDD) chu an chairperson, District Bawrhsap ni bawk, Pu Srinivas Sadi kaihhruainain an thu khawm a, naupang kum 1 atanga 19 inkar ten rulhut an pai lohna tura rulhut hlo pek beihpui leh rulhutin a nghawng thalote inzirtirna, National Deworming Day 2026 thawhkhatna neih dan tur te leh HPV Vaccine pek chhuah chungchang an sawiho.

He hunah hian Pu Srinivas Sadi chuan kalkhawmte hnenah lawmthu a sawi a, HPV virus chungchang chu Mizo hmeichhe naupangte leh an nu leh paten a tangkaina leh pawimawhna te an hriat a tul tih a sawi a, hemi kawngah pawh hian inzirtirna “awareness” neih a ngai dawn a ni, a ti. Bawrhsap chuan NDD chu kumtin kalpui thin a nih angin kuminah pawh kalpui a ni leh dawn tih a sawi a, naupangte chuan rulhlut hlo an dawn vek theih nan kalkhawmte chu an theihna zawnah hma la theuh turin a chah a ni.

Vawiin thutkhawmah hian Committee chuan National Deworming Day 2026 thawhkhatna hawnna chu February ni 10 hian Govt. Selchhunga P/S, Saitualah neih an rel a, hemi ni hian rulhlut damdawi- Albendazole Tablets chu naupangte hnenah sem a ni ang. National Deworming Day hian naupang leh tleirawl kum 1-19 a tin zawn a, school hrang hrangah rulhlut damdawi hi sem a ni ang a, Aganwadi centre zawng zawngah naupang kum 1 atanga kum 5 te hnenah pek an ni dawn bawk a ni. February ni 17 hian damdawi ei hmaih an awm loh nan a thual nawnna (Mop Up Day) hman a ni ang.

Vawiin thutkhawm hi District Coordination Committee for NDD Chairperson leh DC ni bawk, Pu Srinivas Sadi chuan a kai hruai a, Dr. Zothanpari chhakchhuak, Covener & Dy. CMO chuan HPV (Human Papillomavirus) vaccine chungchang sawi zauna a nei nghal a ni. He hunah hian District Coordination Committee for NDD member te an tel a ni.