1891/2024-2025

Saitual, the 4th September, 2024: Vawiin chawhma dar 10:00 am khan Govt. Saitual College Auditorium, Saitual-ah One Day International Conference on Literature, Cultural Studies, Education and Social Sciences hawnna neih a ni a, Saitual Bawrhsap Dr. Lalngura Tlau chu khuallian niin, he hun hi a hmanpui.

He hunah hian Saitual Bawrhsap chuan International Conference pawimawh tak buatsaih theih a ni chu lawmawm a tih thu a sawi a, chhunzawm zel a nih chuan Govt. Saitual College tan pawha hmasawnna rahbi pawimawh tak a nih theih tur thu a sawi. Dr. Lalngura Tlau chuan tunlai khawvelah STEM (Science, Technology, Engineering, and Math) te hian hmasawnna thlen mahse Humanities tel lo chuan hmasawnna a famkim thei lo tih a sawi a. Khawvel hmasawnna atan hian STEM leh Humanities hi kal kawp tlat a ni a ti.

Saitual Bawrhsap chuan presentation pe tura lo kal khawm Research Scholar-te chu a tak taka kan thil tawntea zirchianna (research) nei uar turin a fuih a, kan thalaiten harsatna an tawh hrang hrang- ruihtheihthilte, hna zawnnaahte, zirlaiah-te zirchianna nei a, heng harsatna sutkiang dan kawngte ngaihtuah turin a chah a ni. Bawrhsap chuan an presentation pek turah te duhsakna a hlan nghal bawk a ni.

Prof. Jamkhongam Doungel, Professor, MZU, Fullbright Senior Research Fellow, Univesity of Cinnaniti, USA chuan Social Science leh Humanities subject hrang hrangte danglamna leh pawimawhna sawizauna hun a hmang a, mihring nunphung zirchian nan heng subject-te hian pawimawhna an nei vek tih a sawi.

ICLCSESS hawnna hun hi Pi HK. Vanlalhluti, Coordinator IQAC & Assistant Professor GSW-in a kai hruai a, Pu Lalzarmawia, Associate Professor, GSC chuan inlawmna thu sawiin, khuallian Dr. Lalngura Tlau, Prof. Jamkhongam Doungel-te bakah hian Pi Debbie Lalrinawmi, Director, CHSSR leh Pu PL Joseph Lalliantluanga, IQAC Assistant Coordinator, GSC ten thu an sawi a, techinal report hi Pi Liansangpuii Khiante, Convener, Organizing Committee atanga ngaihthlak a ni bawk. Pu P John Tualzamang, Vice Principal, GSC chuan lawm thu sawinain he hun hi a khar a ni.

Hun bul tanna inkhawm hman zawh hian room 5-ah inthen hrangin online leh offline presentation hun hman chhunzawm nghal a ni a. He International Conference-ah hian sawm bik mi 4- Nepal atangin mi 2, Uganda atangin mi 1 leh Mizoram atangin mi 1 an awm a, Offline a paper present hi mi 54 an ni a, Online a paper present hi mi 21 niin, an zingah hian Thailand leh USA atang pawhin an rawn tel a ni.