2918/2025-2026

Saitual, the 15th January, 2026: Vawiin khan Saitual District Disaster Management Authority (DDMA)-in a lo rel tawh angin lirnghing lo thlen thulha chet lak dan zirna ‘State Level Mock Exercise on Earthquake in Mizoram’ chu District dangte ruala neih a ni a, zing dar 10 atang siren hi ri tanin, Govt. Saitual College, Keifang Bazar Market Shed leh District Hospital te chu lirnghing thlenna hmun atana thlan a ni. Tlai lamah hian dar 4:30-ah siren tihrik a ni ang a, Keifang Mel Veng Market Shed chu lirnghinna hmun atana thlan a ni bawk.

Lirnghing thlenna hmun site tina mawhphur turin incident commander leh responsible officer te ruat an ni a, a endik turin observer te ruat theuh an ni bawk. A pumpuia endiktu head observer atan Pu V. Laldinsanga, PD, DRDO chu ruat a ni a, Command centre/ DEOC atangin Pu Lallawmawma, CEO, DDMA, Pu Lalthakima Chhangte, SO leh Pi Christina Lalnunfeli, SDC ten lirnghing thlenna hmun hrang hrang te chu an vil reng a, incident commander te nen inbe pawpin hma lak dan tur te inhrilhhriat zel a ni.

Operation Centre atan hian chhun lamah FCS&CA Godown Area thlan a ni a, zan lamah hian DTO Office, Keifang thlan a nib awk. Incident Commander atan Pu J. Rokima, Addl. SP ruat niin, a tul anga hma la tur te chu staging area atang hian a tir chhuak nghal a ni. Lirnghinna hmun hrang hrangah hian thi leh hliamte chu Quick Response Team- Sub Hqrs YMA leh Adventure club ten an buaipui a, hliam tuarte hi District Hospitalah hruai nghal niin Medical team ten an theih ang angin an lo buaipui nghal a ni. Chhanchhuah ngai zingah hian rualbanlo leh kum upa lam te pawh telin, QRT ten him dam takin an chhanchhuak a ni.

Mock Exercise neih zawhah hian DC Conference Room-ah Incident Commander leh Observer te chuan Review meeting an nei dawn a ni.