Khawvela Salvation Army (Chhandamna Sipai Pawl) hotulu ber General Andre Cox leh a nupui Commander Silvia Cox te chuan vawiin chawhnu khan State Guest House Conference Hall-ah thuthar thehdarhtute an kawm.

General Andre Cox chuan mipui leh Sawrkar in an nupa an lo lawm dan chuan a thinlung a khawih takzet a a ni tiin an lo dawnsawn danah lawmthu a sawi. General chuan a lokal chhan ber chu mipuite hmuh a, an mahni  kawm a, an thu ngaihtlak te, India ramah Salvation Army hnathawh hrang hrang en te, tualchung mipui tana thlarau rawngbawlna mai ni lo a taka khawtlang tana Salvation Army hnathawh leh rawngbawlna en te a nih thu a sawi.

General Cox chuan Mizoram sorkar-in zirna a ngai pawimawh leh rualbanlo te zirna kawnga hma a lakna hrang hrang chu lawmawm a ti a. Khawtlanga pachhe zawk leh  harsa zawkte chhawmdawlna chuan intluktlanna a thlen thei a ni tiin hemi kawngah hian mitinin hma la se a duh thu a sawi bawk.

Hemi hnu hian thuthar thehdarhtute zawhna hrang hrang a chhang zui nghal a. General hi Salvation Army India Eastern Territory, Territorial Commander Col. Lalngaihawmi leh Salvation Army India Eastern Territory Chief Secretary Lt. Col. Lalramhluna leh  Salvation Army officer dangten an tawiawm a ni.

Vawiin vek khan General Andre Cox chuan Governor Pu Vakkom Purushothaman chu a chenna in Raj Bhawan hmuin inkawmhona hun tha tak an nei. Nizan khan Chief Minister Pu Lal Thanhawla chuan General te nupa pualin CM Bangla-ah zanriah a buatsaih sak a ni.

Attachment

  • Loading attachment...