1715/2022-2023
Aizawl the 26th August, 2022 : Vawiin khan Samagra Shiksha Mizoram leh Institute of Advance Studies in Education (IASE) ten Samagra Shiksha Conference Hall Macdonald Hill Aizawl-ah thawhdunna thuthlung an ziak.

Samagra Shiksha leh IASE ten thawhdunna tur an ziah hi Secondary School zirlaite hnena Vocational Interest Research Project neihna tur a ni a. Secondary School zirlaite chu eizawnnaah eng lam kawng zawh tir chi nge an nih tih hriat theihna tur a ni a, zirlaite tuina lam leh an kalkawng thlanpui theihna tur research project a ni.

Samagra Shiksha State Project Director Pu Lalhmachhuana chuan hetianga zirlaite eizawnna tur kawng thlan dik theihna tur research project thawhna tur IASE te nen an nei thei tur chu lawmawm a tih thu a sawi a. Tunlai khawvelah naupangten tui leh nuam ti taka eizawnna kawng an zawh theih tur lam hriat hi a pawimawh em em a, ram changkang te phei chuan hun rei tawh tak atang khan an lo ngai pawimawh tawh a ni a ti a, Mizo zirlai tam takin an hlawkpui thei dawn a, kan ram zirna atan a tangkai hle dawn a ni a ti.

Prof. Lallianzuali Fanai, Principal, IASE pawhin he hunah hian thu a sawi a, Research project an kalpui dan tur leh IASE chu Resource & Educational Research & Resouce Centre atana thlan an nih hnua an research project hmasa ber tur a nih thu a sawi a, research scholar-te nen he project hi thawh anih tur thu leh sum senso zawng zawng chu Samagra Shiksha tum tur a nih thu a sawi a. Secondary zirtirtute pawh a kalhmang tur chiang taka hrilh hriat a pawimawh tur thu a sawi bawk.

Thawhdunna thuthlungah hian Samagra Shiksha aiawhin Pu Lalhmachhuana, SPD-in hming a ziak a, IASE aiawhin Prof. Lallianzuali Fanai, Principal-in hming a ziak bawk.