Vawiin khan Krishi Vygyan Kendra, Mamit District, Lengpui leh Central Institute of Fresh Water Aquaculture (CIFA), Bhubaneshwar, Orissa tangkawpin a buatsaih ni thum awh tur training chu Dr. S. Ayyappan, General, ICAR leh Secretary DARE chuan a hawng.

Dr. S. Ayyappan chuan Mizoram chu lehkhathiam tamna state, a chengte pawh changkan leh taima tak an ni a ti. Research & Education department hrang leh Agriculture service nei thei state tlem te zingah Mizoram a tel ve chu lawmawm a tih thu sawiin training a lo kal te chu an thil zir te chhawr tangkai a, sangha khawi a hma sawn phah nan leh an thar tam lehzual theih nan a hmang turin a fuih a ni.

He training hawnna inkhawm, Agriculture Secretary Pu T.V. Fambawl kaihhruai ah hian Central Agriculture University Vice Chancellor Dr. S.N. Puri pawhin thu sawiin Mizoram kut hnathawktute taimak zia chu lawmawm a tih thu leh an thar tam lehzual theih nan he training mai bakah agriculture lama mi thiamte chhawr tangkai ngei turin a fuih a ni.

Hawnna Programme ah hian KVK Mamit District te lehkhabu buatsaih ‘A manual on Polyculture in Mizoram ‘ tih leh ‘Kitchen Gardening’ bakah CIFA, Bhubaneshwar ho siam lehkhabute tlangzarh a ni bawk.

Training ah hian Dr. B. Meenakumari, DDG (Fisheries) ICAR, New Delhi ; Dr. O.P. Singh, Fisheries Director ; Dr. Ayub Shah, Dean College of Vety., Selesih; Director, CIFA; KVK Programme Co-ordinator leh official engemaw zat bakah Mamit District a sangha dil nei mi 30 ten training hi an chim a ni.

KhuallianDr. S. Ayyappan hian KVK hnathawh hrang hrang a hmun ah a tlawh a, hun reilote chhunga ram puma chhuanawm thama an hma lakna te a hmuh in lawmawm a ti hle. Lengpui a Fisheries Department hma lakna pawh a hmun ah tlawhin vawiin vek hian New Delhi panin a thlawk chhuak nghal a ni.