2109/2025-2026

Siaha, September 12, 2025 : Vawiin khan DRDO Conference Hall, Siaha-ah tribal mite tana Sangha khawi leh enkawl chungchang ni khat awh inzirtirna neih a ni a. District Fisheries Development Office buatsaih vawiin hun hmannaah hian Sangha khawitu mi 50 an tel.

Vawiina inzirtina hun buatsaih hi Pi C. Lallianpuii, DFDO-in kaihruaiin inlawmna thu a sawi bakah inzirtirna neih tur kalphung tlangpui a sawi bawk. DFDO chuan ‘district dang aiin Sangha khawina kan nei ṭha lo emaw kan inti ṭhin a, sawrkar scheme hrang hrang zarah tunah chuan a ni tawh lo a; amaherawh chu kut hnathawktute tan zaa za (100%) ṭanpuina (free) ang kha a awm tawh hlawm chiah lo va. Man tlawm zawka lei theih tura chhawpchhuah erawh a awm nual’ a ti. Sangha pawh Siaha district mipui chawmna tur bakah district danga thawnchhuah tur thar thei khawp kan ni tawh’ a ti. A neitute thawhrimna leh taihmakna a pawimawhzia sawiin, mi thiamte aṭanga zirtirna dawn ang ang a taka kalpui chhunzawmtu nih tum turin kalkhawmte a fuih a ni. Pi C. Lallianpuii chuan ‘hnathawktu tak tak chuan ni khat lek awl pawh an ui avangin an huan leh lo lamah an liam nitin a, office-a therhlo beiseia kal zing zut ho chu thawktuten ngaihdan chintawk an nei fo a, ṭanpuina mamawh tak tak chu rim taka thawktute hi an ni’ a ti.

Inzirtirna hi hun hnihah ṭhen niin Pi Lalrampari Chhangte (AFO) leh Pu Bruno Gante (FD) in thupui pathum - 'Training on culture of India Major Carp and Pond Management', 'Water Quality Management in Aquaculture' leh ‘Disease and Health Management in Carp Culture' hmangin powerpoint hmangin an zirtir a, zawhna leh chhanna hun hman a ni. Mizoram Sawrkar hnuaia Fisheries Department-in a buatsaih ‘Fishery Handbook’ Mizo ṭawnga ziah chu sem a ni bawk. Pi C. Lallianpuii, DFDO in lawmthu sawiin hun tihtawp a ni.