2151/2025-2026

Dated Serchhip, the 11th November, 2025: Vawiin khan Serchhip DC Pu Paul L Khuma chuan Serchhip DC Meeting Hall-ah Sardar @150 Unity March neih tur chungchang sawiin Serchhip District chhunga press mite a kawm.

DC chuan Sardar @150 Unity March hi Sardar Valabhai Patel pian champhaphak vawi 150na denchhena neih tur a nih thu a sawi a. India ram chu hnam hrang hrang, tawng hrang hrang hmang leh sakhua in ang lo tak tak awm khawm kan ni a; India ram hi kan hmangaih a, culture in ang lo tak tak ten inunauna leh inpumkhatna kan neih theihna turin he Ni hi hman thin a ni, DC chuan a ti.

Serchhip khawpuiah chuan November ni 19, chawhnu dar 1 ah Unity March neih a ni dawn a. Government Higher Secondary School, Serchhipah Pu Gavit Gogna, Serchhip SP hoin bultan a ni anga.Leisekawt Field ah culture programme hman a nih dawn bakah Faina Beihpuihthlak a ni anga. Kawng zawh tawpna hi Serchhip DC Office tualzawlah, hnam lam chi hrang hrang nen khar a ni ang.

Unity March ah hian school naupang te, college zirlai te, sawrkar hnathawk te an tel dawn a. He hun hi ngai pawimawh a, Serchhip mipui a thei apiang kawng zawhnaa tel tur hian Serchhip DC Pu Paul L khuma chuan a sawm a ni.

Serchhip District chhung Thenzawl Sub Division ah pawh Unity March hi neih a ni dawn bawk a ni.

Sardar Valabhai Patel hi Iron Man of India tia vuah niin India ram inpumkhatna atana mi pawimawh a ni a. British awp behna ata India ramin zalenna a hmuh khan India ram bung hrang hrang te chu princely state a awmin, lal tam tak hnuaiah an kun a. Heng princely state 500 chuang zet awm te hi Indian Union a tel turin sawm leh lakluh an ni a. Tuna India ram hi a lo pian theihna tura thawhhlawk ber chu Sardar Valabhai Patel hi a nih avangin a pian champha hi National Unity Day atan kum tin hman thin a ni.