No.3034/2020-2020

Vawiin khan Pu C Lalramzauva, Advisor to Chief Minister chuan Bairabi Rail Station-a Stockyard leh Zophaia IR Border Out-Post-a tlawh a, Pu Kawlhnuna, IFS, Conservator of Forest, Northern Circle leh Kolasib district a Environment, Forest & Climate Change Department a hotuten an tawiawm.

Pu C. Lalramzauva, Advisor to Chief Minister chuan, Bairabi Rail Station kaltlanga thing thawnchhuah thin chu Covid-19 hrileng inkharkhipna avangin duh angin kalpui theih a nih rih loh thu a sawi a, Saw Mill Licence pek chhuah a, chak zawk leh hlawk zawk a heng kan ram hausaknate hi hman a nih theih nan Sawrkarin hma a lak mek thu a tarlang a.
Pu C.Lalramzauva chuan khawtlang hruaitute kawmin, Bairabi chu khaw pawimawh tak, ei leh bar chawk luhna hmunpui a nih piah lamah tun hripui kan hmachhawn mek kar a kan unau lo haw te hmuahna hmun tangkai tak a nih thu sawiin Bairabi khawtlang mipui te tlawmngaihnaah leh inpekna zawng zawngah lawmthu a sawi a.

Advisor to CM chuan, harsatna nasa tak kan hmachhawn mek karah intodelh duhna thinlungpu a mahni phak tawka hma la an pung mek ni a lang chu lawmawm a tih thu a sawi bawk a ni. Bairabi Rail Station leh a chhehvel a thingtum thawnchhuah tur dahkhawmte hi Covid-19 hrileng a vangin hun rei tak thawnchhuah theih lohin a awm tawh a, hemi avang hian a hlutna pawh nasa tak a tlahniam tawh tur a ngaih a nih thu sawi bawk a ni.

Ministry of Environment, Forest & Climate Change, North Eastern Regional Office atangin January leh May, 2020 chhungin Rail Wagon 588 thawn chhuah phalna hmuh a nih laiin ram pum a inkharkhip kalpui a nih tak avangin wagon 254 chiah thawn chhuah hman a ni a. Wagon 334 thawn chhuahna hun hi September thla thleng pawh sei leh niin thing tum 1,31,669 bawr vel la awm anga chhut a ni.

Pu C.Lalramzauva hian Conservator of Forest, Northern Circle Office, Kolasib District tualzawlah, Pu Kawlhnuna, CF nen thingphunna hun an hmang bawk a, Zophai IR Border Outpost a tlawh nghal bawk a ni.