He thu hi Vawiin ah khan Administrative Training Institute(ATI) Auditorium ah Law and Judicial Department chuan nodal officers, superintendants leh Assitant hnathawk, court case file khawih tu te tan nikhat awh traning leh inrawnkhawmna hun a buatsaih hawnna ah Law Minister Pu Lalsawta’n a sawi a. File khawihtu Official te a inzir peih a ngai a ni a ti.

Training hawngtu, Law Minister Pu Lalsawta chuan officer leh court case file khawihtute chu tunlai thiamna hrang hrang internet, mobile phone leh hmanraw dang te an case khawih ti chak zawnga tangkai taka hmang turin a chah a. Supreme court thutlukna thar ber ber pawh internet ah bih peih thin a ngai a ni a ti. Court case file te hi a khawihtu official ten an zirchian phawt chuan pawn lam titi “sawrkar khin a buam, sawrkar khin chu hneh a awlsam” tih te hi a lo reh vek tawh ang a ti a ni. “Sawrkar officer pawimawhte hian an department leh sawrkar kalphunga kan dan neihte an hriat hneh hle a ngai a. Chung chu department-in a zawm phawt chuan court-a inkhinna hneih theihna mai nilovin court-a khin pumpelhna kawng a ni bawk a ni. Dan bawhchhiattir tumtu hotulu ber ber te leh politician pawh tumah hlau lo ngam turin ka fuih duh che u a ni”, a ti a. Minister leh zahkai deuh bik hotulu te pawh dan huang chhung chin a zah mai tur a ni a ti.

“Court-a khin kan nih kan hriat veleh a khawihtu bik ruat fel a, uluk taka zirchian a tih tur –documents copy pawimawh fawmkhawma, parawise comment te sawrkar ukil hnena pek thuai thuai hi a pawimawh em em a ni. Engkim hi a rang thei ang bera tih thuai thuai ngai vek an nih avangin court-a hman tur doucuments pawimawh copy chu sawrkar ukil hnenah pek vat vat tur a ni”, Law Minister chuan a ti a. A tul phawt chuan sawrkar ukil te pawh mobile phone pawh a be mai turin court case file khawihtu te chu a chah bawk a ni.

Thusawitu dang Chief Secretary Pu Lalmalsawma chuan case tamna deuh ber chu Land & Revenue leh service chungchang a nih thu a sawi a. Case tam takah sawrkar a chaklo fo mai leh sum tam tak a chawi thin chu tih tawp theih a ni a ti a. Civil case file khawihtu ten tan an lak a an inzir peih leh a hun taka hna an thawh phawt chuan sawrkar hi a dikna ah mimal khingtu a hnehloh ziah na tur chhan a awm lo a ni tiin case khawihtu te chu inzir peih turin a chah a. Sawrkar in ukil tha ber nei mahse an mamawh document pawimawh te file khawihtu ten a hun takah an peih theih si loh chuan chak a har thin a ni a ti a. Dealing official-te chu case an hawn reng reng in chiang taka chhiar hmasa tur leh an mamawh document pawimawh thei tur zawng zawng te haih chhuak hmasa thin turin a chah a ni.

Traning hawnna programme hi Law&Judicial Secretary Pu P.Singthanga’n a kaihruai a. Addl.Advocate General Pu A.K.Rokhum, Gauhati High Court, Pu R.C.Thanga, Senior Government Advocate, District Court, Aizawl, Pu Zahmingthanga Ralte, Deputy Secretary, Law&Judicial Department leh Pi Lalrochami Ralte, Sr.Civil judge, Serchhip ten training chhimtu te zirtirna an pe a ni.