Nimin chawhnu ah khan Tourism Minister Pu John Rotluangliana chuan Sairilzo Bunghmun ngaw, Lengpui Airport bul a mi sawrkar in khualzin veivakte tlawhtheih tura a riruat mek chu a tlawh a. Minister hi KVI Chairman Pu K.Lianzuala, Pu Vabeiha Hlychho, Director ,Tourist Department , Lengpui Village Council member-te, Lengpui YMA hruaitu-te leh sawrkar mi pawimawh ten an tawiawm a ni.

Helai hmun tlawhtu Tourism Minister Pu John Rotluangliana chuan ramngaw thiah a uihawm thu sawiin zobawm ramhmul rah leh par chhuah chi hrang hrang te sa-va tlan duh tur phun belh in khualzin-te hip nan hman a that zawk thu a sawi a. He lai ramngaw chhehvel a puk awm te pawh in tlawh a hlawh hle tura a rin thu a sawi a ni.Sairilzo Bunghmun hi Lengpui dai hnai taka awm, sairilzo khawhlui hmunhma a ni a. Helai hmuna Bung lian tak awm a hi sairilzo Lal in ‘ hriatrenga thing’ atan phun niin Lengpui tualchhung mite chuan an sawi a ni. NREGA kawngpui pahnih in hmun hnih atangin a pawh in Lengpui Tourist Lodge bul atang leh LAD park bul atangin a pan theih a. Lengpui khawtlang hruaitute in an lo beisei dan chuan Kut liantham deuh hmanna atan siam ni se tih a ni a. Sawrkar thuneitu ten an han enchian tak hnuah hian helai ngaw tha tak leh thengthaw nuam taka Bung lian tak awm leh a chhehvela thing leh mau te tichhe lova Eco-tourism site siam a rel ta zawk a ni.

Tourism Department hotute chuan Mizoram ah Eco-tourism site siam a la awm loh thu sawiin helai hmun, Aizawl khawpui atanga hnai tak, airport bul lawka awm hi Mizoram a Eco-tourism site hmasa ber atan siam a rem chan thu an sawi a. Tourism Minister in thurawn a pek angin Sairilzo bunghmun leh a chhehvel ngaw chu Eco-tourism site atana siam a nih theih nan project an duan tur thu an sawi a ni.