1651/2025-2026

Dated :Mamit the 29th of September, 2025 : Vawiin khan Smt. Padmini Singla, Joint Secretary, Ministry of Textiles & Central Prabhari Officer, Aspirational District, Mamit chuan vawiin khan Mamit tlawhin, Mamit khawpui chhunga hmasawnna hmel lanna hrang hrangte a hmuna a tlawhkual bakah Heads of Offices-te meeting a neihpui.

Meeting-ah hian Central Prabhari Officer chuan Mamit District Aspirational District-in hmasawnna kawng a zawh mekah NITI Aayog atanga lawmman dawng chhunzawm zel thei tura tan la turin leh lawmman dawn tawh te atanga hmasawnna hna thawh hrang hrang te chu Mamit District mipuiin tangkai taka an hman theih nana hma la zel turin a chah a. Mamit Aspirational District chuan hmasawnna kawng a zawh zel theih nan department hrang hrang hotute pawh ngun taka ngaihtuah a, project tha leh tluantling siam thin turin a chah.

Pi Carolyn L.B Khiangte, Adll. DC chuan Aspirational District Mamit a hmasawnna hna thawh tawh leh thlen chinte, tehfung hrang hranga kan dinhmun leh Aspirational District chawikanna atana sawrkar laipui atanga tanpuina dawn dan leh a hman dante a lem nen a tarlang a. Mamit District hi tun dinhmunah delta ranking-ah 14 na kan ni mek a, District chawikanna atana sum dawn tawh hi Rs 19 crore a ni.

Meeting-ah hian Line Department hrang hrangte pawhin an hmachhawp leh hmabak, harsatna awm thei hrang hrang an thlente chu Prabhari Officer hian ngaihthlak sakin, Window-II (innovative Project category) hnuaiah Project 19 Central Prabhari Officer-a thehluh tawhte sawiho niin siamthat ngai laite sawiho a ni bawk.

Aspirational District, Mamit viltu hian District Hospital, Govt Mamit College, Anganwadi Centre 9, Health Wellness Centre Chhimveng, Common Service Centre Bazar veng, Health Wellness Centre Hmarveng bakah Vaubekawn puantahna hmun tlawhin, an dinhmun zirchianna a neih bakah an hmasawnna tur hrang hrangte enin thawktute nen inkawmhona neiin an hnathawhte tha thawkhata a hriat thu a sawi.

Central Prabhari Officer site visit hi Pu K.Laltlawmlova, District Bawrhsap leh Pi Carolyn L.B Khiangte, Addl. DC te  chuan an tawiawm a ni.