Vawiin khan State Guest House, Conference Hall-ah Sawrkar Laipui, Ministry of Social Justice & Empowerment-a, Chief Commissioner for Persons with Disabilities Pu Prasanna Kumar Pincha leh Mizorama pianphunga rualbanlote enkawl leh buaipuitu pawl hrang hrang 7 aiawhte chuan inkawm ho na an nei a. Chawhnu lamah Chief Secretary Pi L Tochhong nen meeting an nei bawk. Inkawm hona leh meeting-ah hian Pi B Sairengpuii, Commissioner, Persons with Disabilities, Mizoram; Pi Vanlaldini, Director, Social Welfare Department leh a thawhpui te pawh an tel a ni. Meeting hmasa zawk ah hian pianphunga rualbanlo mi engemawzat an tel bawk a ni.

Pu P K Pincha chuan pianphunga rualbanlote tan leh an hmakhua ngaihtuah a Dan siam Persons with Disabilities Act 1996 Mizorama kalpui anih dan leh he Dan in a phut angte Sawrkarin a hlen chhuah dan rawn en leh zir tura rawn kal anih thu a sawi. Meeting-ah hian pianphunga rualban lote chuan Persons with Disabilities Act awm chunga harsatna an tawh dante leh an rawtna te an thlen a. Pu P K Pincha chuan nimin lamah Department lian thenkhat hotulu te nena an meeting-ah pianphunga rualban lote tan hna ruak hnawhkhat theih la hnawhkhah loh backlog vacancies an neihte chu a rang lama Social Welfare Department leh DP &AR ah te thehlut tura a hriattir thu a sawi lang a. PWD Act in a huam chin a lungawih lohna an neih te chu Mizoram Commissioner for Persons with Disabilities hnenah ziaka thehlut thin turin a chah bakah an lungawih lohna lehkha chu a office pawh hriattir turin a hrilh bawk a ni. Pu P K Pincha hi pianphunga rualbanlo (Mit del) niin Delhi atangin amah chauhin a rawn kal a, tun tum hi Mizoram a rawn kal vawi thumna a ni.

Chhiarpui (Census) 2011-a chinchhiah dan chuan Mizoram pumah pianphunga rualbanlo 15160 an awm a, heng zingah 8627 chu zokhaw lama awm niin 6533 chu khawpui a awm an ni. 15160 ah hian kut leh ke lama harsatna nei Orthopedically Handicapped (Locomotor) 1976; rilru chaklo leh rilru lamah harsatna nei Mental Retardation 1585; khaw eng hmu lo Visual Impairment 2035; beng hriatna lamah harsatna nei Hearing Impairment 3354 leh rilru natna nei Mental Ilness 1050 te an ni. Tun thleng hian mi 8362 hnenah pianphunga rualban lohna lehkha Disability Certificate pek an ni tawh a ni.

Pianphunga rualbanlo tan hian Mizoram pumah sikul bik Special School 8 a awm a, Aizawl -ah School 3, Kolasib a sikul 2 leh Lunglei, Serchhip leh Saiha ah te pakhat theuh a awm. Chungte chu Aizawl a Gilead Special School(zirlai 284); Special Blind School (zirlai 28) leh Moriah Blind School (zirlai 11); Kolasib a Special School for the Mentally Handicapped (zirlai 66) leh Integrated Blind School; Lunglei-a Special School for Persons with Disabilities (zirlai 60); Serchhip a Shalom Special School (zirlai 40) leh Saiha a Mary Hechia Residential Special School (zirlai 30) te an ni. Kum 2012- 13 khan pianphunga rualbanlo zirlai 803 hnenah Children with Disabilities Scholarship pek a ni a, 2013-14 khan hetiang Scholarship hi zirlai 788 hnenah pek a ni bawk.

Mizoram puma sikul 2356 ah hian pianphunga rualbanlote kalna bik ramp siam ni tawh in heng ang hi zirna in sang ah chuan Pachhunga University College leh Mizoram University ah te chauh siam a ni.

Persons with Disabilities Act ah hian pianphunga rualban lote tan Sawrkar hna leh zirna in ah te za zelah pathum hauh sak a ni a. 1996 atang khan pianphunga rualban lote 44 chu Mizoram Sawrkar hna a lak an ni tawh.

Tunah dan dinglai mek Persons with Disabilities Act, 1996 aia tha leh fuankim zawk, dan thar tur Rights of Persons with Disabilities Bill, 2014 chu Rajya Sabha-ah a pawmpui tura thehlut a ni a, Lok Sabha thar in a pawmpui hnuah chauh he Bill hi Dan niin a takin a hman theih dawn a ni.