No.3408/2020-2020

Aizawl, the 24th July 2020 : Vawiin khan SBI Foundation chuan Mizoram Sawrkar hnenah Ventilator 3 cheng nuai 5 man hu an hlan a. Health Minister Dr. R. Lalthangliana hnenah SBI Foundation aiawhin Pu L.P. Lalchangkima, Regional Manager, SBI leh a thawhpui midang 2 ten Minister pisa ah heng khawl te hi an hlan a ni.

Health Minister Dr. R. Lalthangliana chuan SBI Foundation leh SBI te inpekna chu ropui tiin lawmthu a hrilh a. Bank te hi mipui tana thawk, mipui ta an ni tih sawiin an thil pek hian mipuite ta an nih bakah mipuite rawngbawlsaktu an nih zia a lantir tih a sawi. COVID-19 hripui leng dona kawngah harsatna tam tak kan hriat ngailoh leh beisei ngailoh kan tawng a, hetiang boruak kara pawl leh mimal in phal te malsawmna bi tura an luang chhuak thin hi a lawmawmin he hripui hneh thei ngei tur pawh hian fuihna thar min pe thin a ni, a ti. Hripui dona atan sawrkarin sum a seng nasa a, quarantine facilities enkawl nan te leh thil dang tulah pawisa hmanna a tam a, hetiang hun harsa leh khirhkhan, sum harsatna kara SBI Foundation in ventilator Mizoram tana a rawn pe hi a lawmawmin a hlu leh zual a ni, a ti.

Pu L.P. Lalchangkima, Regional Manager, SBI chuan ventilator-te hi SBI Corporate Social Responsibility (CSR) kal tlang a pek a nih loh thu sawiin, SBI malsawmna dang "SBI Foundation" kaltlanga pek a nih thu a sawi a. CSR kaltlangin Mizoram sawrkar hnenah June thla khan PPE set 600 pek a lo nih tawh thu leh ventilator hi a dang pek belh leh turin ruahmanna siam mek a nih thu a sawi a ni.

SBI Foundation hi India ram pumah SBI hnathawkten an phal anga sum an thawh atanga din niin ram pumah thil pek hrang hrang an lo hlan thin tawh a ni.