4286/2025-2026

4th February, 2026 : Vawiin khan School Education Department-in thla tina a chhuah thin Meichher Award 2025 chu School Education Directorate Conference Hall-ah sem a ni.

He huna khuallian Pi Angela Zothanpuii Director School Education chuan thusawiin Meichher hi Mizo thu leh hlaa kan article lar tak tak lo chhuahna a ni a,thuziaktute pawh mi chhuanawm tak tak an ni a ti a. thu leh hla hi mihring min vawngtu pawimawh a ni tih sawiin thartharte hian lehkha ziak hlutna hi kan hriat thar leh a ngai a, hnam pum leh Department pawhin hma kan lak nasat a ngai hle a ni a ti. Director chuan saptawng thiam ngaihsanna hi thlaka mahni hnam tawng ngaihsanna kan neih a, kan chawisan zel a ngai a ti a. Director chuan Thu leh hla thiltihtheihna sawiin thu leh hla avangin indona te a chhuak a, thu leh hla avang bawkin indo te an lo chawlhsan tawh a ti a. Meichhera chhuak thu leh hla tha rawn ziaktute chu mithiam tak tak te an ni hlawm a, hei hian thu leh hla pawimawhna a lantir a ni a ti bawk.

Pu TC Lalremsiama Editor-in a report danin Meichher chanchinbu hi “ZORAM ÊNG' tih hming vuahin March/April 1975 ațang khan thlakip chhuakin chhuah tan a ni a. October 1975 atang khan 'MEICHHER' tia a hming thlâkin vawiin thlengin chhuah a ni. Nikum 2025 khan kum 50 a tling a, Meichher Golden Jubilee 2025 lawmna chu June 26, 2025 khan Aizawl Vanapa Hall-ah hlawhtling taka neih a ni. Kum 1975 March & April thla chhuak atanga chhiarin January 2026 chu bu 815-na a ni.

Meichher Publisher atân hian tihchhuah tan tirh atangin Department hotu ber Director chu hman a ni thîn a; Meichher Publisher ni lai chu Pi Angela Zothanpuii, Director, School Education Department a ni. Meichher Editor mi 10 an awm tawh a; Meichher Editor hmasa ber chu Pu R. Lalrâwna a ni a, tûna Meichher Editor ni mêk chu Pu T.C. Lalremsiama a ni.

Meichher chanchinbua thu chhuahte zingah hian zirlaibua seng luh thuziak 22 a awm tawh a. Hengte hi School leh College a Mizo zirlai atan hman an lo ni tawh a ni.

Meichher Best Article of the year 2025-ah pakhatna Rev Zosangliana Colney Mission Veng Aizawl a ni a, a thu ziah chu Lal thar chibai i buk ang u tih a ni a, pahnihna Pu Joseph L.Ralte Chawnpui Veng a ni a, a thuziah chu Hlawhtling tura beidawnna tih a ni. 3-na Commissioner Lalkiamlova Tuikual South Aizawl a ni a, a thuziah chu Vawk leh Mizote tih a ni.

Meichher Best Contributor of the year-ah pakhatna Pu JH Biakmawia Electric Veng, Aizawl, pahnihna Pu Familia Laltansanga Fanai Zotlang Lunglei, pathumna Pu Mahmuaka Chhakchhuak Chanmari Lunglei te an ni.

Meichher Award semnaah hian  Mizo Academy of Letters General Secretary Dr Zoramdinthara leh Mizo Writter  Association President Pu R.Lallianzuala te pawhin Award hmu tur an endik dan te an sawi a. Department Officer te, SCERT Director leh MBSE Controller te, thuziak mite leh Award dawngtute leh tawiawmtute an kalkhawm a ni.