1835/2023-2024

Aizawl, 11.09.2023: Vawiin chawhnu khan Bharat Scouts & Guides State Council Meeting chu School Education Minister Pu Lalchhandama Ralte kaihhruiana hnuaiah Apex Bank Conference Hall, MINECO ah neih a ni.

Vawiin meeting ah hian State Headquarters building sakna tur chungchang sawiho a ni a. Govt. Primary School-III, Tlangnuam hmunah sawrkarin building sakna tur hi a phalna a pe tawh a. Vawiin committee hian a sakna tura preliminary report chhawpchhuah chu a thuphunga pawmin, bawhzui ngai dangte chu inhriattir zui zel ni se tih a ni.

State Secretary Pu Lalngilneia Colney hnen atangin kumin chhunga Mizoram Bharat Scouts & Guides hmalakna hrang hrang report ngaihthlak a ni bawk a. Kumin January thla khan 18th National Jamboree chu Rajasthan ah nghah niin, Mizoram atangin mi 50 an tel a. February ni 22 World Thinking Day chu SYS Conference Hall-ah hman a ni bawk. Scoutsmaster leh Guide Captain te tan Beginner Course March thla khan bautsaih niin, School hrang hrang atangin zirtirtu 10 an tel. Trivia Sopan Scouts & Guides Training Camp chu Kolasib District ah Scouts 36 leh Guides 55 tan November thla, 2022 khan buatsaih a ni a. Aizawl khaw chhungah May ni 5, 2023 khan Cleanliness Drive buatsaih a ni bawk.