No.3848/2020-2021

Aizawl, the 6th August 2020: Vawiin chawhnu khan School Education Minister Pu Lalchhandama Ralte Office Chamber-ah Minister hovin lirnghing chanchin zir mithiamte nen Tuipui ral lirnghing an zirchianna an sawiho.

Tun hnai khan School Education Minister chuan Tuipui ral linghinna khaw hrang hrangte hi zan hnih riakin a tlawh kual a, a hmuna chengten an tawrh dan te a thlir kual a. Tlawhkual mai hi duh tawk lovin lirnghing chanchin zir mithiamte chu a hmun ngeiah an hmanraw neih ang ang nen kala zir chiang turin a sawm a. Mithiam rualte chuan lirnghinna hmun hi chamchilhin an zir zui ta a ni.

He Meeting kaihruaitu School Education Minister chuan Tuipui ral tawrhna chu Mizoram mipuite leh sorkarin a tawrhpui a, an lam an hawi reng tih a sawi a. Leilung lam zir mithiamte an penchhuak thin chu Tuipui rala chengten an thlamuanpui hle a, kan mithiamte hi kan chhuang hle a ni a ti bawk.

Pu Ramthanmawia, East Tuipui Bialtu MLA pawhin he hunah hian thusawiin lirnghingin Tuipui ral a chhu nawn sek mai chuan mipuite a tibuai nasa a. Mithiamte a hmunah rang taka an thleng chho thei nghal erawh a thlamuanthlak tih a sawi a. Mipuite mamawh an sawi apiang sorkarin a ngaihtuah nghal zel a, Minister 4 leh MLA 2 ten an tlawh bawk a, mipuite mamawh chi hrang hrang an tihsak nghal zel a, bial chhung manganna a chhawk nasa a, a lawmawm hle a ni a ti.

Lirnghinna hmun tlawhtu Geologist-te chuan an thil hmuh dan an sawiah chuan lirnghing a awm fo hian Radon gas a rawn tichhuak thin a, radon gas a lo tam chuan ei leh in a tibawlhhlawh a, hriselna a ti khaw lo nghal thei a, Radon gas level hi teh vat theih nise, tul an tih thu an sawi a. Leilung chhungril awm dan data chu Champhai atangin Keitum thlengin an la a, US Geological Survey ah an thawn a, heta tang hian leilung khik dan leh inthleh dan te a hriat theih dawn a ni an ti a. Lei khi chat lian tham thleng mai thei anga mi thenkhatten an hlauhthawn chu thil thleng mai thei nia an hriat loh thu an sawi a, chutih rualin Mizoram hi lirnghing na tak thlen theihna hmun anih avangin khawchhak lirnghing atang hian inhmakhua ngai an tih thu an sawi bawk a ni.

Meeting-ah hian lirnghinna hmun tlawhtu dang Zofa Consultancy services te pawhin Tuipui ral chhung chu insak dan him kawhhmuh ran tha an tih thu an sawi lang bawk a ni.

Lirnghing chanchin zir mite hi MZU, MIRSAC, Zirtiri Science Residential College leh Lunglei College a thawkte an ni a, Zofa Consultancy Services ten in chhia siamthat leh dan tur an en bawk a ni.

Tuna hriat theih chinah Tuipui ral welfare ten an chhinchhiah danin lirnghingin a tihchhiat leh a tihhmelhem te hi mimal in 471, sorkar leh Kohhran in 29 te a ni.

He sawihonaah hian Transport Minister Pu T.J. Lalnuntluanga bakahTuipui rala han zin Geologist te, Zofa Consultancy Services leh Tupui ral Welfare hruaitute pawh an tel a ni.