No.188/2021-2022

Aizawl, 19th April, 2021 : Vawiin khan School Education Minister Pu Lalchhandama Ralte hovin Aizawl-a SCERT Seminar room-ah Samagra Shiksha Annual Work Plan & Budget 2021-22 thlirho a ni.

Samagra Shiksha Annual Work Plan & Budget 2021-22 ah hian Secondary leh Higher Secondary School hawn thar turte, Balvatika (Pre-school) hawn thar dan tur te, naupangin thiamna tak tak an neih theih nana zirna kalphung thar neih dan tur te, NEP 2020-in a ngaih pawimawh Skill Development leh Vocational Education chungchanga zirna kalpui dan tur te, Hindi teacher atana rawtna te thlir a ni a. School naupang hmeichhiaten school-ah harsatna an tawh loh nana ruahmanna siamsak te, vohbik naupangte tana chetvel awlsamna tur leh inthiarna a hranga siam dan turte, Higher Secondary tan Science laboratory leh an room mamawh leh ruahtui khawlna siamna tur ruahmanna te, District thar pathum tana DIET thar hawnna tura ruahmanna te a tel a ni. Heng rawtna chi hrang hrangte hi Govt. Of India-ah thehluh a ni dawn a ni.

Pu Lalchhandama chuan meeting-ah hian Samagra Shiksha officer leh thawktute inpekna leh thawhrimna avangin lawmthu a sawi a. Tun hmaa New Delhi-a appraisal leh PAB meeting neih thin chu hrileng avangin online-a neih a tul leh dawn tih sawiin Minister chuan online-a Appraisal leh PAB meeting neih hunah pawh Mizoram tan thahnemngai taka thawk turin a ngen a ni.

Pu L.Thangmawia Human Resource Development Vice Chairman pawhin he meeting-ah hian thusawiin HRD Board-in thingtlanga zirna chawikan nana pawimawh tak, Teachers quarters chu Board-in a ngai pawimawh hle tih a sawi a. Hrileng kara online teaching kalpui dan chu bihchian ngai a tih thu te, IT lama hmasawnna tur pawh Samagra atanga ngaihtuah ngai a tih thu a sawi bawk.

He meeting-ah hian School Education Minister leh HRD Board Vice Chairman bakah School Education Special Secretary Pu Lalzirmawia Chhangte, Director Pu James Lalrinchhana, SPD Pu Lalhmachhuana te bakah School Education, SCERT leh Samagra Shiksha Officer-te an tel a ni.