No.3726/2021-2022

Aizawl the 19th January, 2022 : Vawiin khan School Education Minister Pu Lalchhandama Ralte hovin SAW Conference Hall Aizawlah Samagra Shiksha Mizoram hmachhawp leh Annual Work Plan & Budget 2022-23 siam dan tur ruangam thlirho a ni.

School Education Minister Pu Lalchhandama Ralte chuan thusawiin hrileng avanga state hrang hrangin sum leh paia harsatna an tawh mekna karah Mizoram School Education Department chuan thawktute inpekna leh thawhrimna avangin hmasawnna a hmu chho zel a ni a ti a. Samagra Shiksha hnuaia thawk mi sangnga bawr zette hlawh leh SCERT hnuaia thawktute hlawh pawh bat nei lovin Department-in a pe fel thei a, chumi piah lamah State Matching share pek theih loh avanga Central share hmuh theih loh a awm lova, Finance lamah pawh sum tang a awm lo a ni tih sawiin lawmawm a tih thu a sawi. Minister chuan Samagra Shiksha plan siam turah rintlak data nen siam nise a duh thu a sawi a, thawktute chu an hnaah an chiang a, an tui bawk a, an fakawm hle a ni a ti a. Samagra Shiksha hnuaia thawktute hlawh a ngaia a ding rei lutuk chu chawisan dan awm thei se a duh thu leh plan siam turah thawktute hamthatna lam zeh tel theih dan kawng awm se a duh thu a sawi bawk.

Samagra Shiksha Annual Work Plan & Budget siam dan tur thlirhonaah hian National Education Policy(NEP) 2020 mila plan siam a tul dan te, tun hmaa sorkar sikula naupang kum 6 an tlin hnua lut thei chauh chu NEP 2020-in kum 3 atanga a rin luh tak dan leh naupangin zirna bul a tanna chu ngaih pawimawh anih tak dan te sawiho a ni a. Naupang chu kum 3 leh kum 4 a nih chhungin Anganwadi-in an enkawl ang a, kum 5 a tlinin school pangngaiah a lut tawh dawn tih te leh hemi atana tul additional classroom leh mamawh dangte sawiho a ni a. Secondary School tan naupangin subject har an tih Science leh Mathematics zirlaibute chu English ringawta ziak lovin state thenkhata an kalpui dan angin English leh Mizo tawnga ziah dan tur ruahman te leh zirna atana mamawh chi hrang hrangte an sawiho a ni.

He thutkhawmnaah hian Pu L.Thangmawia, MLA & Vice Chairman HRD Board, Dr Lalzirmawia Chhangte, IAS, Secretary, School Education, Pu JH Zoremthanga, Chairman MBSE, Pu James Lalrinchhana Director, School Education, Pi Laldawngliani Chawngthu, Director SCERT, Pu Lalhmachhuana, SPD Samagra Shiksha leh Officer dangte an tel a ni.