1613/2025-2026

Dated Aizawl, the 11th August, 2025: School Education Minister Dr. Vanlalthlana hovin vawiin khan Teachers' Day 2025 hman dan tur relin State Working Committee for Celebration of Teachers' Day chu Directorate of School Education Conference Hall-ah an thukhawm.

Minister Dr. Vanlalthlana chuan zirtirtute pawimawhzia sawiin, naupang chu a tet te atanga zirtirtu thain zaidawh tak leh awmze neia a enkawl chuan a hlawhtlinna kawng a awlsam bik tih zirmite’n an fiah tawh tih a sawi a. Sawrkar hnuaia zirtirtute tana hamthatna hrang hrang tarlangin, insurance tih pawimawhzia a sawi bawk a. Zirtirtute Ni ropui tak leh hlawkthlak taka hman a nih a, zirtirtu hna chawisan a lo nih zel theih a beisei thu sawiin, rorelna hun a hawng nghal a ni.

State Working Committee chuan a hnuaia tarlante hi an rel a ni:

1. Chief Minister leh School Education Minister-te’n thuchah intawm leh an thlalak chuang ngeia zirtirtute chibai an bukna thu Print Media (Daily Newspaper)-ah Display Advertisement-a chhuah ni se. Aizawl District huamchhunga Daily Newspaper 5-ah chhuah ni se. Department Social Media (Facebook, IG leh X)-ah te post ni se.

2. School Education Minister Teachers’ Day pual thuchah chu AIR/DDK/Cable TV Network-ah te tihchhuah ni se. DEO/SDEO-te kaltlangin school hrang hranga Teachers’ Day lawmna huna chhiarchhuah tura semdarh ni bawk se.

3. Teachers’ Day 2025 pualin Standee leh Banner-te sawrkar hmun pawimawh leh mipui vantlang hmun langsar laiah tar ni se.

4. Zirtirtu dam lo leh natna khirhkhan tuarte tanpuina, National Foundation for Teachers Welfare (NFTW) Fund-a pawisa thawhzat chu Rs. 200/- atangin Rs. 300/-ah tihsan ni se. Teachers Welfare hnuaia Budget Provision Rs. 1,00,000/- awm chu NFTW Account-ah chhun luh leh ni se.

5. District Level Teachers’ Day lawm chungchangah District tina Deputy Commissioner Chairman-na hnuaiah lawm dan rel ni se. Zirtirtu chawimawina dawng tawhte tan anmahni khua leh vengah chawimawina hun siam ni se.

He’ng bakah hian Doordarshan-a spot promo leh Teachers’ Day puala programme chhuah turte, All India Radio nena thawhho dan tur leh private school-te’n hemi ni lawmna atana banner an tar theih dan turte sawiho a ni bawk.

Kumin Teachers’ Day, September ni 5, 2025 (Zirtawpni) hi chawlh a nih avangin September ni 4, 2024 (Ningani)-ah lawm tur a ni a; sawrkar school calendar-ah pawh tarlan a ni.

Thutkhawmah hian Pu David Lalthantluanga, School Education Special Secretary-te, Pi Angela Zothanpuii, School Education Director te leh School Education hotu dangte an tel a. Anni bakah Aizawl Deputy Commissioner, Information & Public Relations Department, All India Radio, Doordarshan (DD) Aizawl, leh zirtirtu pawl hrang hrang - HISSLAM, MISSTA, MSTA, MPTA, MISA, MATF, MHSHTA, MMSHTA – aiawhte an tel bawk a ni.