School Education Minister Pu H. Rohluna chuan vawiin khan D.El.Ed (Diploma in Elementary Education) Study Centre Coordinator leh Resource Person-te tana ni hnih awh training buatsaih chu SCERT Auditorium-ah a hawng. He training programme hi Right to Education - in India rama Govt., Govt. Aided leh Unaided-Private school a zirtirtu thawk zawng zawng chu April ni 1, 2019 ral hmaa training nei hman vek tura a phutna bwhzuina a ni.
School Education Minister chuan ram hmasawnna atan zirna a pawimawh ber thu sawiin, zirna tha leh changkang naupangten an neih theih dawn chuan zirtirtu thiam leh thahnemngai an pawimawh hle a ni a ti a. Ministry leh Department kaltlanga zirna kalphung tha zawk siam tuma hmalakna nasa tak awm thin mahse a hlawhtlinna chu zirtirtute ah a innghat a ni, a ti a. Training a hlawhtlin ngei theih nan a chhimtuten run dalah chauh ngai lo turin leh, D.El.Ed neih tuma zirte chuan hnathawhna qualification tih bikimna ang chauhva ngai lovin, thiamna tak tak chharchhuaka, naupang an zirtirna in hma a sawn phah ngei a beisei thu School Education Minister chuan a sawi a ni.
Vawiin training hawnna inkhawm hi Pu Lalthawmmawia, School Education Director chuan kaihruaiin, Pi D. Ramdinthangi, SCERT Joint Director leh NIOS State Nodal Officer ni bawk chuan lawmthu sawiin a khar a ni. Zirtirna hi NIOS (National Institute of Open Schooling) atangin Dr. Babli Chowdhary leh Dr. Manoj Naik ten an pe dawn a ni. He 2-Day training-ah hian District hrang hrang atanga DIET, Higher Secondary School leh High School atangtein Coordinator leh Resource Person an kalkhawm a, a vaiin mi 320 an ni.
RTE Act, 2009 siamthat a nih hnu in Govt., Govt. Aided leh Unaided-Private school a zirtirtu thawk training neilo te chu April ni 1, 2019 hnu lamah chuan ban an nih tawh dawn avangin NIOS atanga zirtirna petu turte pawh hian tun tuma elementary level-a zirtirtu thawk mekte tan D.El.Ed nei tura in-service training buatsaih chu "last chance" anga ngaih theih hial a nih thu an tarlang. D.El.Ed course la tur hian online a registration tih a ni a, mi 7316 an in register tawh a ni. Elementary School a thawk B.Ed Degree nei pawhin D.El.Ed hi an neih ve tho a ngai a ni.
