Vawiin khan School Education Minister Pu H. Rohluna
chuan B. Ed. Special Education, SCERT leh B.Ed. Education, DIET zirna, SCERT Auditorium,
Chaltlang-ah hawngin, Minister hi khuallian a ni.
Khuallian chuan SCERT leh DIET, Aizawla B.Ed. zir
theihna tura hmala tu zawng zawng hnenah lawmthu a sawi a. B. Ed. Special Education leh B. Ed. Education
zirna atana kum 2015 atanga hmalak chu vawiinah a puitlinna hmuh a nih chu lawmawm a ti a.
Mizoram University in affiliation a pek theihnante, National Council of Teacher
Education (NCTE) in permission a pek theihnantea hmala tute hnenah lawmthu a
sawi bawk a ni. He zirna atana mamawh phuhruk tute SCERT, DIET, RMSA, SSA te
chu fakawm a ti bawk a ni. Zirna tha zawk kan ram leh hnamin a mamawh avangin
hna phurrit dang SCERT leh DIET Faculty ten anla hi, fakawm a ti zual bawk a
ni. B.Ed Special Education Course zirlaite hi Vohbikte enkawlna lamah leh
zirtirna kawngah dinhmun pawimawh tak anla chelh dawn a ni, tiin a sawi a.
North East mai nilo, India rama B.Ed Special Education zirna awmchhun Mizoram
in a nei hi rahbi pawimawh tak a ni, a ti a. Zirlai mithar leh ni chho mek B. Ed.
Special zirtute chu thuawihna, taimakna leh thawhrimna nena zir zel turin a
fuih bawk a ni.
B.Ed. Special Education (Hearing Impairment &
Visual Impairment) hi Kum 2 course niin, Directorate of SCERT, Mizoram hnuaiah
batch hmasa ber chu August, 2018 atangin tan a ni. Hearing Impairment leh Visual Impairment
class-ah hian zirlai 30 ve ve lak a ni. He B.Ed. Special Course hi
Rehabilitation Council of India (RCI), National Council of Teacher Education
(NCTE) te pawmpuina in Mizoram University hnuaiah Affiliation pek a ni. He
course hi Vohbik zirtirtu leh enkawltuten vohbikte enkawlna kawnga chiang zawk
leh chipchiar zawka zirna an pek theihna atana buatsaih a ni.
B.Ed. Education
Programme hi DIET hian ni 15th April, 2018 ah NCTE Inspection
atangin phalna hmuin, 28th May, 2018 ah Mizoram University atangin Provisional
Affiliation hmuh a ni a, Academic Session 2018-2019 chu August atang hian tan a
ni. Mizoram University chuan IASE fee structures te zawmve turin a ti bawk a
ni. B.Ed. Education Programme hi Kum 2 zir course niin, mark 2000 pu course a
ni. Mark 1250 chu Core leh Soft Course niin, mark 500 chu School internship leh
mark 250 chu Enhancement of Professional Competencies Courses (EPC) atan a ni
ang. Tun dinhmunah hian zirlai 50 an awm a ni.
Pi Laldawngliani Chawngthu, Director, SCERT chuan he
hun hi kaihruaiin, Pu Lalthawmmawia, Secretary, Higher Education leh midangte
an tel a ni.
