Vawiin khan Aizawl-a Education Centre Conference Hall-ah School Education Department hnuaia hatsatna leh chinfel ngaite sawiho a ni a. He sawihona hun hi Pu Lalchhandama Ralte School Education Minister, chuan a hmanpui.

Minister Pu Lalchhandama Ralte chuan he consultation-ah hian thusawiin School Education Department chu Mizoram sorkar hnathawk zaa 30 bawr vel zet thawhna a ni a, heti zozaiin tan kan lak chuan kan ram hmelhmang a tidanglam ang a ti a. School-ah zirtirtu indaih lohna a nasa a, elementary lamah MR teacher kan lak avangin a ziaawm ta deuh a, High School lamah indaih lo tak tak an la tam hle a ni, a ti a. Thingtlangah class la thei tal school tinah awm se tih sorkarin a duh laiin khawpuia luh dil an tam hle a ni a ti. Minister chuan School Education-ah officer an indaih loh avangin SDEO post thenkhat chu luahtu awm lo, midangin an kawp ngai a ni a, hemi chingfel tur hian Mizoram Education Service chu an thlir mek a, MES tihhlawhtlin nan Association hrang hrangte chu inhlan then a ngai anih pawha inhuam turin a sawm a ni. Zirtirtute chu sorkar hnathawk dang aia hna zahawm thawk an nihna vawng nung turin a sawm a, an tih tur leh tih loh turte pawh hre chiang turin a chah a ni.

Minister chuan School naupangte chu Controlling authority-te hriatpui leh phalna la hmasa lo chuan pawn lam mite huaihawt programme-ah chhuah a rem lo tih a sawi bawk.

He sawihona hun hi Federation of Mizoram Government School Teachers (FMGST) in a buatsaih a ni a. School Education Minister bakah School Education Secretariat-a Officer-te, Directorate-a officer te, MBSE, SCERT, Samagra Shiksha, DIET a Officer te leh Teachers Service Association hrang hrang hruaitute an kalkhawm a. He sawihonaah hian Service Association hruaituten zirtirtute harsatna chi hrang hrang an sawite chu official lamin chhan ngai leh sawifiah ngaite an sawifiah nghal bawk.