No.6672/2020-2021

Aizawl, the 26th November 2020: Vawiin chawhma khan Pu Lalchhandama Ralte School Education Minister chuan a office chamber-ah Duhlian tawng Mizo tawng tih lehkha Pu C.Lalhluna ziah chu a tlangzarh.  

Tlangzarhna hunah hian Pu Lalchhandama Ralte, School Education Minister chuan Pu C.Lalhluna'n lockdown lai hmang tangkaia ram leh hnam tana rohlu lehkhabu a lo ziak thei chu lawmawm a tih thu a sawi a. Zohnahthlak hnam hrang hrangte tawng thu avanga kan inchemhar lek lek laite a awm a, heng Zohnahthlak hrang hrang tawng atang hian Mizo tawng hi a piang ang tih hi Zirlai pawlten an thlir thin thu a sawi. Kan unau Zohnahthlakte hi tlemin danglamna awm hret hret mahse, inpawmtawna, rorelna pakhat hnuaia kan awm theih hun tur hi ngaihtuah a ngai a ti bawk. Minister chuan thangtharte tan hetianga thlahtute leh tawng chhuina lehkhabu chhiar tur hi a vang hle a, kan ram leh hnam kal zel turah lehkhabu tangkai tak a ni dawn a ni a ti a. Ram hrang hranga Zohnahthlak ten an lo hmuh ve hunah pawh an ngaihhlut tur lehkhabu tangkai tak a ni dawn a ni a ti.

Lehkhabu ziaktu Pu C.Lalhluna chuan Duhlian tawng tih lam hi lehkhabu kan la neih ngai loh a ni a. Chhiar tur mumal awm si lo,  Zofate inpumkhatna atana pawimawh tak bawk si nia a hriat avanga ziak anih thu a sawi.

He lehkhabu tlangzarhna hunah hian Dr R.L. Dangvela chuan inkhawm a kaihruai a, Pu Lalhruaitluanga Chawngte-in lehkhabu thlirlawkna hun a hmang a,  C.Chhuanvawra, Padma Shree Awardee pawhin thu a sawi a ni.