1746/2022-2023

Aizawl 29th August, 2022 : Vawiin khan Govt.Chaltlang Higher Secondary School, Aizawl ten Freshers’ Social 2022 leh 23rd Annual School Sports Closing Function Govt.Chaltlang Higher Secondary School, Aizawl-a an neih chu School Education Minister Pu Lalchhandama Ralte-in a hmanpui.

School Education Minister Pu Lalchhandama Ralte chuan Zirlaite chu tunhnaiah Hripui (Covid-19) avangin kum hnih chhung chu Class pangngai pawh neih theih a ni lova, Zirlai a pangngai reng bawk si a, chuvang chuan nasa leh zuala zirna an chhunzawm a pawimawh thu a sawi a, Zirlaite chu an rilru put hmang a dik a, thuawihna, dawhtheihna, taimakna leh tum mumal nei a, hma thlir thui tak, tha tak an neih chuan hlawhtlinna an chan ngei a beisei thu a sawi bawk.

Minister chuan hun engemawchen atang khan All India Service-ah Mizo an lut tlem ta hle tih sawiin tunhnaiah state thenawm te atangin Central Service lamah an tling nasa hle thung a ni a ti a. Pathianin finna, theihna, thiamna talent tha tak min pek hi hmang chhuak thei tura taimakna nei tur te, All India Service lamah pawh tling thei turin rilru put hmang thlak a, hnam rilru pu chunga theih tawp chhuah turin zirlaite chu a fuih bawk. Minister chuan Zirlaite chu Social Media hmanna kawngah pawh fimkhur turin a chah a, an thil hmuh leh an hriat zawng zawngte a dik nge dik lo tih pawh finfiah hmasa lova, Social Media lama pawng tawng rak vel vak hi thil thalo tak a ni a, Social Media hmannaah pawh aia upate zahna lan tir thiam tul a tih thu a sawi bawk.

Minister chuan Zirtirtute chu Zirlai naupangte zirtirna an pekna kawngah an zirlai piah lamah zirlaiten kawng dik leh nun dan tha an neih theih nan zirlai naupangte entawntlak a nungchang mawi tak nei turin a chah a. Tunlaiah zirtirtuten dan leh hrai te pawh an hriat chhoh zel a tul thu sawiin ngaihtuahna hmang zel turin Zirtirtute chu a chah bawk.

Khuallian School Education Minister hian Annual Sport a titha te lawmman a sem nghal a, Annual Sports kharna Flag lak thlakna hun a hmanpui bawk. He Closing Ceremony hi Pu C. Laldinliana, Lecturer-in a kaihhruai a, Pi Lalrosangi Ralte, Principal-in thusawina hun a hmang a, special item bengvar thlak tak tak zirlai ten an entir bawk. Govt. Chaltlang Higher Secondary School-ah Science leh Art zirna awm in Zirlai naupang 652 leh Zirtirtu 15 an awm a, Office Staff 7 an awm bawk.