No.3238/2020-2020

Vawiin July ni 19, 2020 Pathianni chawhnu dar 3 khan School Education Minister Pu Lalchhandama Ralte chuan kum 2020 HSSLC exam result chhuak a Arts topper Lalhlimpuii d/o Vanlallura , Darlawn khua chu tuna a chenna in Ramhlun Venglai ah a tlawh.

Minister Pu Lalchhandama Ralte chuan, a bial chhung Darlawn khua aţanga zirna lama mi chhuanawm a rawn chhuak chu lawmawm a tih thu Lalhlimpuii a tlawh tum hian a sawi a. Taksa lamah harsatna nasa tak tawk chunga beidawnna in a hneh zawh loh Lalhlimpuii chu zirlai leh ţhalaite tan entawntlak a tih thu sawiin, zirna kawnga ke a pen chhohzelna turah a tih theih chinah chuan theihtawp a ţanpui a inhuam thu Pu Chhantea chuan lalhlimpuii hi a hrilh a, Joint YMA Darlawn in chawimawina an neih huna Darlawn a pan chhohna tur Motor a tumsak dawn thu leh a office ah Lalhlimpuii hi topper a nihna lawmsak a tum thu Minister chuan a sawi bawk a ni.

Lalhlimpuii hi pawl 1 atanga pawl 5 thleng a mit ţhat loh avangin Special Blind School, Durtlang ah a kal a, hemi hnu hian Darlawn ah zirna chhunzawm chho lehin pawl 10 thleng Darlawn ah hian a kal a, pawl tinah pakhatna a ni chho vek a ni.

Mit ţhatlohna avangin ziak leh chhiar lamah harsatna nasa tak tawk mahse pawl 11 leh 12 chu St. Joseph HSS, Aizawlah a lut zir chhunzawm a, kumin 2020 HSSLC exam result chhuak ah khan Arts stream ah Mizoram pumpui ah pakhatna a rawn ni leh ta a ni.

Tuivawl bialtu MLA leh School Education Minister ni bawk Pu Chhantea hian a bial chhung khaw 22 aţanga pawl 10 passed thar zawng zawngte lawmpuina thuziak leh Dictonary a lo hlan vek tawh a, a bial chhung aţanga pawl 12 result chhuaka hlawhtlinna chang zawng zawngte lawmpuina hlan leh vek a tum bawk a ni.

Vawiin a Arts topper Lalhlimpuii School Education Minister in a tlawhna ah hian Pu Lalthangbika, MBSE Secretary chuan a ţawiawm a ni.