Vawiin chawhnu khan Ramhlun Sports Complex-ah Mizoram Higher Secondary School Games 2014 kharna programme buatsaih a ni a, Games kharna programme hi School Education Minister Pu H. Rohluna leh Parliamentary Secretary Pu Joseph Lalhimpuia ten an hmanpui a ni.

Pu H.Rohluna chuan School Education Department hnuaia Physical Education Wing-in kumtin hlawhtling taka School Games an buatsaih thin a, National level-a inelnaah, zirlai naupang ten medal an hawn thei thin te hi hmasawnna ropui tak a tling a ni, a ti. Infiamna chu tunah chuan eizawnna a tling tawh thusawiin infiamna lamah hmasawn tur leh hming chher tur chuan zirlai naupangten tun atangin tan in lak a, mahni in inthunun a, nun in uluk a ngai a ni, a ti.

School Education Minister chuan zuk leh hmuam insum a, ruihtheih thil laka fihlim a, ei leh in uluk a, mahni invawn thianghlim leh infiamnna lamah inpek chuan hlawhtlinna a awm ngei a, hun harsa te thleng mahse a tawp ah inchhirna a awm ngai lo a ni, a ti bawk. Indian Super League-a Mizo footballer thiam tel te hian sports hi eizawnna a tling a ni tih an nemghet thusawiin Sawrkar ruahmanna Catch Them Young Policy chu a hlawhtling chho mek a, Mizo infiammi te National leh International level-a kan lang mek te hi he policy rah duhawm tak a ni, a ti.

Pu Joseph Lalhimpuia pawhin thusawiin Mizote hi khawvel huapa inelnaah kan tha tawk a ni tih kan hriat leh a tha ber a kan inngai tur a ni a tiin infiamna lamah hetiang rilru pu turin naupang te a chah a. Zirlai naupangten infiamma lamah hma an sawn theih nan School Education Department chuan ngawrh takin hma a la mek zela, tun aia nasa leh zawkin tan lak tum a ni a ti bawk. Kar hmasa lamah Mizo zirlai naupang pahnih ten National School Games 2014, Madhya Pradesh a neih taka, Taekwondo inelnaah Bronze Medal an la chu an chhuanawm hle thusawiin hei hi School Games rah a ni thu a sawi bawk. Zirlai naupangte chu Mizoram ti hming thatu leh Mizoram chawimawitu ni theuh turin a chah bawk a ni.

School Education Minister Pu H.Rohluna chuan discipline hrang hranga Team tithate hnenah no mawi a hlan a, Parliamentary Secretary Pu Joseph Lalhimpuia’n tunhnaia National School Games neih taka Taekwondo-a Bronze Medal latu – Lalthlamuanpuia, Govt. Mizo HSS, Aizawl leh Sheeba Laltanpuii, Govt. Mamawii HSS, Aizawl te hnenah Incentive Cash Award a hlan a, he inelna a tel Mizoram Taekwondo Team midang 9 hnenah Certificate a hlan bawk a ni.

Higher Secondary School Games kharna ah hian Pu B. Lalchhuanliana, Addl. Director School Education Department chuan inlawmna thuchhah a sawi a, Pu F. Zokima, Organizing Secretary-in report tawi a sawi bawk.

Tun tuma Mizoram Higher Secondary School Games neih tak hi a vawi 13-na niin November ni 25 khan tan a ni a. He Games-ah hian zirlai naupang 1472 (mipa 978 leh hmeichhia 334) telin lecturer 190 in an ho a. He Games a hian Aizawl khawpui atangin School 14 leh Aizawl pawn lam atangin school 13 an tel a ni.

Sports discipline 8 - Athletics, Badminton, Basketball, Football, Judo, Taekwondo, Table Tennis, leh Volleyball ah te inelna buatsaih a niin Aizawl khawpui hmun hrang hrangah inelna te hi neih a ni. A pumpuia School ti tha ber chu Govt. Mamawii HSS Aizawl niin Gold 7, Silver 5 leh Bronze 7 an la a, a dawttu chu Govt. J.L. HSS, Aizawl niin Gold 7, Silver 4 leh Bronze 3 an la a ni. Mipa a Best Athlete chu Nelson Lalnghenchhana, Govt. J.L. HSS a ni a, Gold 3 leh Silver 2 a la a, Hmeichhia Best Athlete chu Ramtharnghaki, Govt Mamawii HSS niin Gold 4, Silver 2 leh Bronze 1 a la a ni.