No.1892/2021-2022

Khawzawl, the 17th August 2021: August 14 chawhnu khan Pu Lalchhandama Ralte, School Education Minister chuan Khawzawl Higher Secondary School (Science & Commerce) sakna tur hmunhma tlawhin chak zawka hmalak dan tur leh thil tih hmasak ngai laite Official-te a sawipui.

Education Minister chuan Khawzawl HSS tuna Adhoc Aided ni mek chu sawrkarin a ngaihpawimawh thu leh, Government HSS la awmlohna District a nih avangin sawrkarin theihtawp chhuaha hma a lak thu a sawi a. Khawtlang tangrualin Science zirtirna an kalpui mek chu fakawm tiin, HSS tihhmasawn chungchang hi Dy Chief Minister Pu Tawnluia, bialtu MLA nen pawh tum engemaw zah an sawi thin thu leh, sawrkarin District tharte kawng tin rengah thawm chak zel a tum thu a sawi a ni.

Minister chuan hrileng vanga harsatna kan tawh mek lai pawhin sawrkar chuan zirna a ngaihpawimawh a, kum 2021-2022 session atan Khawzawl HSS-ah Samagra Shiksha Abhyan chuan Khawzawl mipuite dil thin pawl 11 leh 12 Science Subject zirna khawtlang sum thawhkhawma kalpui tawh chu a la tan a, Khawzawl HSS ah sawrkar chuan Samagra Shiksha Abhyan hnuaiah Commerce pawh a kalpui tel nghal bawk a ni, a ti a. Zirtirtu lak a la theih loh avanga Online class kalpui mek a nih thu sawiin, Govt G.M HSS Champhaia lecturer ten Science subject an zirtir a; Govt. Saitual HSS a lecturer ten Commerce subject an zirtir thung a ni, a ti bawk.

Education Minister chuan zirtirtu lakna tur pawh peihfel vek a nih tawh thu sawiin, hrileng vanga boruak a zia veleh hna lak tum a nih thu a sawi a. Khawzawl Adhoc Aided HSS chu Sawrkar sikula hlankai a tul hle nachungin hrileng avanga sum lama harsatnate a awm avangin tunah mai chuan tih thei a ni lo a, sawrkar sikula hlan a nih thuai erawh sawrkarin a duh tih a sawi a. Science & Commerce building pawh tun Financial Year chhungin sak tan tum a ni, a ti bawk.

Report a tarlan dan chuan tunah hian Khawzawl Adhoc Aided Sikul-ah hian zirlai 200 chuang hret awm theihna turah zirlai 312 te zirtirtu 12 leh Principal-in an enkawl mek a. Science leh Commerce zirlaite pawh ziah luh niin, zirtirtu tur pawh lak thuai tum a ni.

Khawzawl HSS (Science&Commerce) sakna tur hmunhma endikna hunah hian School Education Minister hi Pu C.Lalmuanpuia, MLA & Vice Chairman, Veterinary & Fishery Board leh Pu Lalrinsanga Ralte, MLA & Vice Chairman, Rubber & Allied Crops Board, Khawzawl Bawrhsap Pu C.C.Lalchhuangkima, Pu Lalhmachhuana, State Project Director & Joint Director, School Education bakah District Education official dang ten an tawiawm a ni.

Education Minister Pu Lalchhandama Ralte leh Law & Judicial Minister Pu T.J Lalnuntluanga te chuan nimin August ni 16, 2021 khan DIET Champhai leh District Education Complex Champhaite an tlawh a, Champhaia B.Ed zirna turte, zirlaite tana Hostel sak tur leh DIET Office Building chung sak chhunzawm mekte an enfiah a, District Education Complex sak mek an enfiah hnuah Mualzen Forest Nursery-ah thing tiak an phun bawk. Minister pahnihte hi Pu C.Lalmuanpuia, MLA & Vice Chairman, Veterinary & Fishery Board, Pu Lalrinsanga Ralte, MLA & Vice Chairman, Rubber & Allied Crops Board, Official leh khawtlang hruaituten an tawiawm a ni.