No.4104/2020-2021

Vawiin khan School Education Minister Pu Lalchhandama Ralte chuan Mamit a zirna hmun hma pawimawh te a tlawh a. DIET Auditorium-ah thawktute nen hun an hmangho.

Minister chuan Mamit chu District ngaihsak ngai bik Aspirational District anih avangin thawktute tan nasa taka tan lak a ngai a ni tih sawiin, thawktute chu inpekna tak tak nen thawk turin a sawm. Minister chuan Zirna tel lovin hmasawnna a kal thei lo tih sawiin hmasawnna kim nei turin zirnaah harh thar a ngai a ni a ti. Sorkarin zirna a ngai pawimawh a, tun hnaiah thawktu mi 1100 bawr vel lak an ni tawh a, High School tan zirtirtu 157 lak phalna pawh hmuh a ni tawh a, Covid 19 avangin sorkarin a la rih lo mai a ni a ti a. DIET pawh zirna hmun pawimawh anih avangin sorkarin a ngai pawimawh tih sawiin sorkarin an mamawh angin a ngaihtuah zel dawn a ni a ti. Mamit chu Aizawl nena inkalpawhna kawngpui a tha chho zel a, Sorkar hnathawk tan Aizawl tih lohah chuan post tha a ni chho tan ta tih sawiin Mamita awm sorkar hnathawkte chu an vannei tih inhre turin a chah a ni.

He hunah hian Mamit bialtu MLA Er H.Lalzirliana pawhin thusawiin DIET a thawktute chu sorkar hnathawk dang ang an ni lo tih sawiin zirtirtu turte zirtirtu an nihna hre reng turin a sawm a. Aspirational District an nih chhan zirna leh hriselna lamah theih tawpa tan lak a tul thu a sawi bawk.

School Education Minister-in Mamita zirna hmun hma a tlawh kualte hi Mamit DIET, DEO office building sak mek, SDEO office building thar sak mek leh Higher Secondary School te an ni a. Minister hi a nupui Flora Rosangpuii leh Mamit bialtu MLA Er H.Lalzirliana te bakah School Education Department a joint Director Pu Lalhmachhuana leh Officer dangten an tawiawm a ni.

Attachment

  • Loading attachment...