3621/2024-2025

Dated Aizawl: the 02 November 2024: Vawiin chawhnu dar 2:00 khan SCERT Auditorium, Chaltlangah, School Education Minister, Dr. Vanlalthlana chuan SCERT buatsaih Mizo tawng Braille lam tawi (Braille Contraction) leh Indian Sign Language hmanga Mizo thumal 365 awmna video chu khuallian niin a tlangzarh.

Tlangzarh inkhawmah hian Khuallian Dr. Vanlalthlana, Minister, School Education Department changtu ni bawk chuan thu sawiin, Mizorama a vawi khatna atana hetiang thil hlu leh pawimawh  nei thei tura thawktu SCERT mithiamte leh midang lo vei chilh thin tute inpekna chu ropui a tih thu sawiin, mitdel hawrawp lamtawi leh standard Indian sign language-te chu Mizoram a zirna hmasawnna kawngah pawh mellung pawimawh tak an nih ngei a beisei thu a tarlang a. Sawrkar ang pawhin Vohbikte chu an ngaihsak hle thu sawiin,  NEP 2020 in a phut angin special education chu  an ngaih pawimawh chhoh  zel tur thu a sawi bawk a. Chutiang lama sawrkar hmalakna thenkhat tarlangin, sikul tam takah chuan wheelchair hmanga rualbanlo zirlaite an chet ve zung zung theihna tur railing siam a nih thu a sawi.

Tlangzarhna inkhawm hi Pi Caroline Zoramthangi, Director, SCERT chuan kaihruaiin, kalkhawmte lo lawmna thu a sawi a. Pi Zoramthangi, Joint Director, SCERT chuan Braiile Contraction, leh ISL video siam a nih dan chanchin report a pe a. Pi Vanlaldiki Sailo, State Commissioner for Persons with Disabilities (PwD) chu Khualzahawm niin, Mizorama special school hrang hrang - Ephatha Special School for the Deaf and Hard of Hearing te, Redeem Garden School, Leitan, leh Special Blind School, Durtlang naupangte atangin zai leh lamte ngaihthlak a thlirho a nih hnuin,  Pi Lalnunsiami, Deputy Director i/c Integrated Education for, Disabled Children (IEDC) chuan lawmthu sawiin hun hi a khar a ni.

Tlangzarh inkhawmah hian Khual zahawm Pi Vanlaldiki, State Commissioner for Persons with Disabilities, (PwD) pawhin thu sawiin, India rama rualbanlo zingah beng lama harsatna nei an tam ber  avangin sorkar inkhawm pawimawh apiangah sign language chu telh zel, tur a nih thu leh Rehabilitation Council of India (RCI) chuan sign language professional a a pawm, mi pasarih (7) kan neih tawh thu te a sawi a. Ani bakah hian Mizo Braille a lo awm theihna tura hmalatu hmasa ber Commissioner Lalkiamlova te Mizo Standard Braille Contraction buaipuitute zing atangin Pu Lalbuatsaiha, Asst. Professor, Political Science, J. Thankima college  te pawhin thu an sawi bawk a ni.

Mitdel hawrawp hi International Standard size a nih avangin hawrawp pangngai anga duh ang anga lian leh te a ziah danglam theih a ni ve lo a, ziak leh chhiar chhung a reiin, lehkhapuan pawh hman teuh a ngai thin. Mitdel hawrawp, Mizo tawnga Braille hmangtuten awlsam leh rualkhai zawka an hman theih turin Directorate of State Council of Educational Research and Training (SCERT) chuan Mizo tawng Braille lamtawi (Braille, Contraction) hi a buatsaih ta a ni.

India rama Sign language hmangtu Special School leh a dangte Sign hman dan hi a inang lo hlawm hle a. Hei hi SCERT chuan a vei hle bakah National Education Policy 2020 chuan  India ramah Sign language ang khat hmang tura a lo tih bawk avangin Mizo tawng thumal 365 hmangin he sign language video hi siam a ni ta a ni. Heng video hi SCERT Official Youtube Channel ah dah a ni a, sign language inang tlang hman a lo nih theih nan leh beng ri hriatna lama harsatna neite tu pawhin kan biak theihna turin heng video te hi a tangkai hle dawn a ni.