Mizorama zirna hmasawnna tur ngaihtuahhona  “Mizoram Education Watch & Envision”  Hillsgate Weekly Newspaper-in Aijal Club-a  buatsaih chu vawiin khan School Education Minister Pu H. Rohluna’n a  hmanpui.

School Education Minister Pu H. Rohluna chuan zirna ram tan a pawimawh thu sawiin zirna tello chuan hmasawnna tak tak a awm thei lo, a ti a. Zirna tihmasawn tura Mizoram Education Reforms Commission rawtna siam tam zawk chu tihpuitlin anih tawh thu sawiin school thenkhat naupang neih mumal lohna te chu sawikhawm an nih thu leh defunct school te chu khar an nih thu a sawi a, Commission rawtna thenkhat chu bawhzui mek a nih thu a sawi bawk. Minister chuan zirtirtute chu zirna kawnga mawhphurtu ber anni tiin zirna hmasawnna atan zirtirtu quality tha a pawimawh thu a sawi a. Zirtirtu lak zawng zawng MPSC kutah dah vek anih tawh thu School Education Minister chuan a sawi a, subject teacher neih sawrkarin a ngaihpawimawh thu sawiin mathematics leh science teacher recruitment rules siamthat anih thu a sawi bawk a ni. 

Pu H. Rohluna chuan zirna hmasawnna ruhrel (infrastructure) lama hmalakna te tarlangin  Serchhip leh Lungleiah te SCA atangin education centre building sak chhoh mek anih thu a sawi a. NABARD atanga sum hmuhin Mizoram chhunga school rawp chhe tawh sak that hna thawh anih tur thu a sawi bawk a. School Education Minister chuan Aizawl leh Lunglei DIET-ahte B.Ed Course nakum session atanga  hawn theih tura hma lak mek anih thu leh beng hriatna leh mithmuh lama harsatna nei te tan B.Ed Special Education Course hawng tura hmalak mek anih thu a sawi bawk a ni.

School Education Minister chuan headmaster a kaisan theihna seniority a kalpui thin chu tih danglam anih thu a sawi a, tunah chuan headmaster-a promotion 50% chu seniority a kaisang an ni anga, 50% chu LDE(limited departmental exam) hmanga hnawhkhah tura ruahmanna siam a nih thu a sawi. Hei hian thalai viak tha leh inzir thar peih te tan headmaster nih theihna tur kawng a hawn tur thu leh zirna inah hmasawnna a thlen ngei a beisei thu a sawi bawk a ni. Pu H. Rohluna chuan zirna lama tuilo te pawhin eizawnna tling an neih theih nan vocational training leh skill development uar taka kal chhoh pui zel anih thu leh ‘inclusive education’ pianphunga rualbanlo ten zirna tha an neih theihna turin sawrkarin theihtawpa hma a lak thu a sawi bawk a. Minister chuan zirlaiten puitlin huna chhawr tlak thiamna an neih nan tan lak a ngai tiin sawrkar chauh ring lovin khawtlang leh NGO te nen zirna tihmasawn tura tanrual a pawimawh thu a sawi a ni.

He hun hi Hillsgate Editor Pu C. Lalhriatpuia’n a kaihruai a. Pu Lalthlamuana Hnamte, President, Mizoram Independent Schools Association; Pu Lalrammawia, Headmaster, Govt Mizo High School Aizawl leh Dr. R. Zonunsanga , Asst. Professor, MZU te chuan presentation an pe bawk a. Chawhnu lamah Mizorama zirna dinhmun leh hmasawnna tur te ngaihtuah leh sawihona hun hman a ni.