Mizo Students Union (MSU) General Conferene vawi 16-na Lallula Run, Sialhawka neih mek chu vawiin khan School Education Minister Pu H. Rohluna’n a Khuallian niin a hmanpui a. He hunah hian MSU Magazine thla tin chhuak tur ‘Kulva’ tlangzarhna neiin Sub-Hqtrs. Sialhawk buatsaih Sialhawk khaw chhuak mihlawhtlingte chawimawina certificate a hlan nghal bawk a ni.

Khuallian Pu H. Rohluna chuan thu sawiin Mizoram chu State bila Education Reform nei awm chhun a ni, a ti a. Zirna tih hmasawn nan sawrkar-in nasa takin tan a lak thu leh hemi kawngah hian hna tam tak thawh  tawh a ni a, hmabak tihlawhtling tura ruahmanna kalpui mek zel a ni, a ti bawk. Right to Information Act in a phut angin zirtirtute chu training pek vek tura tih a ni a; hemi ti puitling tur hian NIOS hnuaiah September Ni 30 thleng khan enrollment tih niin nakum March Ni 31-ah chuan training pek vek hman tum a nih thu a sawi a. Sawrkar chuan a tul angin Recruitment Rules-te pawh a siam tha zel a, Zirtirtute welfare pawh a ngaihtuah sak zel ni a ti bawk.

Zirlaite chu pass mark ngawr ngawr hmuh tum lovin thiamna tak tak zir chhuah tum turin a fuih a. Nakin lawka ram leh hnam innghahna tur zirlaite chu hnamdang kuta ram inrelbawlna dah mai lovin Central Service-a tam zawk inziak tling ngei thei tura tan la sauh sauh turin a chah a. Sawkarin zirtirtu indaihlohna phuhruk nan Science leh Maths High School-a zirtirtu tur 111 (Science-47, Maths-64); Middle School Zirtirtu tur 60 leh Primary School zirtirtu 100 la tura hmalak mek a ni a ti.

Faina kawnga Sialhawk khawtlang leh Sialhawk Education Services Association (SESA) te hmlalakna chu fakawm a tih thu a sawi a. Conference hmang tura kalkhawm palaite chu inhlan thara  ram leh hnam hmangaihna nei thar leh theuh turin a chah nghal a ni.

He hun uaptu Bialtu MLA Pu Lalrinliana Sailo pawhin thu sawiin zirlai  kalkhawmte chu Social Media hmang thiam tura fuihin saptawng zir nan leh finna leh thiamna dangte zir nan hmang thiam thin turin  fuih a. Zirlaite chu hrehawm hmasak hreh lo tur leh mahni inkhawngaihna nei ngailo turin a chah a. Hnambil puala lokal palaite chu fakawm a tih thu a sawi a. Taimakna, rinawmna leh Pathian tihna nena kan thawh tlat chuan ram changkang zawkte tih theih ang hi kan ti ve thei a ni, a ti a. Zirlai kalkhawmte chu theihna leh thiamna an neih theuhte chu lan chhuah tir ngei thei tura tan la zel turin a chah nghal bawk a ni.

MSU Conference hi Ni thum chhung awh tur niin October Ni 11 atanga Ni 13 thleng neih ani ang. Naktuk lamah Pu R. Lalzirliana, Home Minister chuan Khuallian niin a hmanpui dawn a. Kumin khawmpui thupui chu ‘ Zirlaite ram leh hnam tan ‘ tih a ni. Nakum Conference chu MSU General Headquarters, Aizawl-in a thleng dawn a, hruaitu thar thlanna neih a ni ang.

MSU hi kum 2001 khan din niin tun dinhmunah General Hqtr 1; Regional Hqtr. 1; District Hqtr. 3; Hqtr. 6; Sub-Hqtr 33; Direct Branch 6 leh Branch 40 a awm mek a ni. Kumin MSU Conference hi Pandal hnuaia neihna hmasa ber a ni.

Vawiin inkhawm hi Pu Vanlallian Khiangte, Assistant Gen. Secretary-in a kaihruai a. Pu Lalthanzuala , Gen. Secretary-in hmalakna hrang hrang leh pawl chungchanga hriattur awmte report a pe a. Pu RB Lalmalsawma, President, MSU General Hqtr. pawhin thu a sawi a. He hunah hian mal zai, hnam lam leh zaihona te neih niin hun hlimawm tak hman a ni.