No.332/2021-2022

Aizawl, 30th April, 2021 : Vawiin khan Pu Lalchhandama Ralte, Minister School Education, LESDE etc. chuan MINECO, Aizawl-a MYC Office-cum- Coaching Centre leh Youth Centre sak mek chu tlawhin a hmunah hnathawh dan a enpui.

Minister chuan building sak mek pahnih te chu Chief Minister Pu Zoramthanga kaihhruaina hnuaia Mizoram sawrkarin Mizo thalaite a ngaih pawimawh zia leh an hmakhua a ngaihtuah tih lanna a ni, a ti a. Chief Minister pawhin heng centre sak mek te hi a lo tlawh tawh tih sawiin Minister chuan Building pahnih sak mek chu ram tana rotling ni ngei tura uluk taka hna kalpui turin a satute leh enkawltute chu a fuih a ni.

Minister tawiawmtu Pu Vanlaltanpuia MLA & Youth Commission Chairman chuan he centre sak mek tlawhnaah hian Mizoramah Youth centre pathum sak mek a ni tih a sawi a, Aizawl bakah Lungleiah nuai 400 man leh Serchhip-ah nuai 300 man sak mek a ni tih sawiin heng bakah hian Serkawn-ah Coaching Cum Incubation Centre dah tum anih thu leh NEC atangin he centre sakna tur vaibelchhe 6 chuang hmuh beisei a ni tih a sawi.

MINECO-a Mizoram Youth Commission Office Cum Coaching Centre sak nan hian nuai 300 ruahman a ni a. Lushai Engineer -ten a sak hna thawkin he office building-ah hian Chairman Office, Conference room, Secretary room, Establishment, chowkidar quarters leh canteen te a awm dawn a. Kumin kum tawpah chuan sak zawh hman beisei a ni. Hemi rual hian nuai 500 senna tur Youth Centre sak mek ah hian Career guidance room leh Studio te, Volleyball court, Guest room, Gym, Art & Craft room, Table tennis, Chowkidar quarters leh parking te a awm dawn a ni.

Minister-in MYC Office leh Youth Centre sak mek a tlawhnaah hian MYC Chairman Pu Vanlaltanpuia bakah Pu Lalramsanga Sailo IRS, Secretary LESDE leh Pu Donny Lalruatsanga MCS, MYC Secretary-ten an tawiawm a. Building satu leh enkawltuten Minister leh a tawiawmtute hi building sak dan kalhmang leh a room awm dan tur te leh an hnathawh dan te an lo hrilh fiah a ni.