No.4012/2021-2022  

Aizawl, the 16^th February 2022 : Vawiin  khan School Education Minister Pu Lalchhandama Ralte chuan  a office chamber-ah hnam ziarang hmanga intihsiakna National Kala Utsav 2021-a lawmman pakhatna dawngtu  Lalruatfeli Class IX Kids Care School Ramhlun South chu lawmman trophy a hlan.  India ram state hrang hrangte intihsiakna National Kala Utsav 2021 January 1-12,2022 chhunga neihah Visual Arts 3D painting-ah Mizoram aiawha chhuak Lalruatfeli Class IX, Kids Care School, Ramhlun South Aizawl chuan lawmman  pakhatna hi a dawng a, hripui leng avangin National Kala Utsav hi virtual mode-a neih a ni a. Lawmman hi Union Minister of Education aiawhin Pu Lalchhandama Ralte hian a hlan a ni. 

Minister chuan he lawmman hlanna hunah thusawiin ram pum huap intihsiakah Mizoramin history thar kan siam a, National Kala Utsav-ah hian kum dangah lawmman pahnihna leh pathumna te chu kan lo dawng tawh a, pakhatna kan la dawng ngai lova, kuminah Lalruatfeli Class IX, Kids Care School Ramhlun-a zirlaiin Mizo hnam tihming tha tura Visual Arts 3-Dimentional-ah   lawmman a dawng hi  sorkarin kan lawmpui hle a ni a ti. Hei hian hun lo kal zel turah Mizo naupangte kutthemthiamna leh thluak lamah India ram huapah talent ropui tak kan nei a, kan nep lo a ni tih min hmuhtir a, hripuiin min chim velna karah pawh Mizo hnam tihmingtha thei kan nei hi kan lawm hle a ni a ti a. India ram mihring tam tak karah lawmman pakhatna dawngtu kan nei hi ropui kan ti a, kan chhuang a ni a ti a, zirlai dangteah pawh chona thar a pek kan beisei a, Mizo naupangte talent hi India ramah phochhuah tham, zawrh tlak, hnam zahpuiawm lo kan tih entirtu anih avangin kan lawmpui a ni a ti bawk.

Lawmman hlanna hunah hian Visual Arts 3-Dimentional lawmman pakhatna Trophy Ministry of Education-in a rawn thawn chu Minister Pu Lalchhandama Ralte chuan Lalruatfeli a hlan a, Gold medal chu Pu Lalhmachhuana SPD Samagra Shiksha-in a hlan a, lawmman tangkafai chu Pu C.Lalthanzira Additional SPD-in a hlan a ni. 

Kala Utsav 2021-ah hian Ministry of Education chuan a ruahman sa angin category hrang hrangah intihsiak  ni a, chungte chu-  Vocal Music-Classical, Vocal Music – Traditional Folk, Instrumental Music- Classical, Instrumental Music – Traditional Folk, Dance – Classical, Dance – Folk, Visual Arts 2-Dimentional, Visual Arts 3-Dimentional, Indigenous Toys and Games te an ni. Hripui leng avangin National level-a intihsiak hi hmun khatah neih theih a ni lova, online a neih a ni a, Lalruatfeli pawh hian online-in a thilsiam chu a lantir a, Delhi atanga endiktute pawhin online bawkin zawhna an duh ang ang an rawn zawt bawk a ni. 

Kala Utsav hi Ministry of Education-in India rama hnam zia rang chi hrang hrang tun hma atanga tun thlenga la chin chhoh zel zirlai talent nei tha tak tak ten an pholanna leh intihsiakna atana a buatsaih a ni a.  Kum 2015 atang khan India ram state hrang hranga Secondary School leh Higher Secondary School zirlaite chu he Kala Utsav-ah hian an intihsiak thin a. National level-ah NCERT-in he Kala Utsav hi an buapui a,  Samagra Shiksha chuan state tinah he intihsiak hi an buatsaih thung a ni. State hrang hrangten mahni state chhungah theuh Kala Utsav hi an buatsaih a. State Level Kala Utsav-a State tina a ti tha te chu National Kala Utsav-ah an intihsiak leh ta thin a ni.