1460/2024-2025

Aizawl 6th August, 2024 : Indian Space Research Organisation, North Eastern Space Applications Centre leh Mizoram Remote Sensing Application Centre tangkawpin an buatsaih National Space Day, 2024 lawmna Assembly House, Annex, Treasury Square, Aizawl-ah neih chu Dr. Vanlalthlana, School Education Minister-in khuallian niin a hmanpui.

Khuallian chuan thu sawiin National Space day mai ni lo, Kum 2023, August ni 23-a thla chhim tawpa Chandrayan 3 Moon Lander Shiv Shakti Point-a a tum (soft landing) champha hriatrengna leh lawmna hun pawimawh tak hman theih a ni chu lawmawm a tih thu a sawi a, he hlawhtlinna hian mi tamtak rilru-ah vanthengreng zirbingna (Space technology) leh vanthengreng hriat chak lehzualna naupang zawkte rilruah a chawh thawh mai bakah hun lo la awm zel tur tana mel lung pawimawh tak a nih thu a sawi. Van thengreng hriatna chu kan ram ngei pawhin kan hmang tangkai hle a, a bik takin ka enkawl School Department hnuaia school naupangte thlipui leh ruahpui laka lo invenlawkna kawngah tiin kan rama chhiatrupna thleng thei laka lo inralrinna kawngah thil tangkai tak a ni thu a sawi.

Khuallian chuan vawiina school naupangte chu an thil hriat duhna chu tipung zel a, thil thar leh khawtlang tana kan tangkaipui tur ngaihtuah chhuak zel tum tura fuihin hmasawnna lama kan harsatna (pain points) te chu a sutkian dan tur ngaihtuah a, kan theihna zawng zawng sawrchhuak a, inlungrual taka kan chenho theihna tura rilru hmang thin turin a chah a ni.

He hunah hian Dr. Rocky Pebam, Sci/Eng SF, ISRO-NESAC, Shillong chuan report tlangpui pein India ram chu thla leilung thleng thei ram 4-na kan nih thu a sawi a. Dr. Senthil Kumar G, Sci/Eng SF, ISRO-URSC, Bangalore chuan Moon Mission chungchang, Chandrayan 3 Mission an kalpui dan a lem nen a entir a. Chandrayan 3-ah hian Propulsion Module,  Lander Module (Vikram) leh Rover Module (Pragyan) te awmin tunah hian Lander Module leh Rover Module te hi thla leilung zirbingna (research) titur a design a nih angin an awm mek reng a, Propulsion Module chu thla orbit atangin lei a laklet a ni. Khawvel atang hian thla hi km nuai 4 vel niin chandrayan 3 hian ni 40 vel hun a hmang thla thlen nan hian hun a hmang a. India chu USA, Russia, China hnuah thla leilung thleng thei ram palina a ni. Thla leilung thleng thei ram te hian thla leilung atang hian thil tam tak zirbingna neiin thla leilung atang hian vanthengrenga thil dang awm (Celestial bodies) te awlsam zawkin an zirchiang thei dawn bawk a ni. Er. H. Lalsawmliana, CSO, DST & Member Secretary pawhin thu a sawi bakah NESAC & MIRSAC Team atangin Audio Visual Show & Space Exhibition Display thlirho a ni bawk. 

National Space Day, 2024 puala Quiz buatsaih lawmman semna khuallian hian a nei nghal bawk a. He Quiz intihsiakah hian School 25 atangin naupang 2 theuh an tel a. Lawmman pakhatna hi Govt. Saitual HSS-in dawngin pahnihna Govt. Mizo HSS leh pathumna Synod HSS an ni. 

National Space Day hmanna hi Pu Lalmalsawma Pachuau, Secretary, P&PID, Govt. of Mizoram chuan kaihruaiin Pi Hmingthanpuii, Principal Scientist, MIRSAC chuan kalkhawmte hnena lawmthu sawina a nei. School naupangte leh Scientist te hian inkawmho neiin zawhna leh chhanna hun hman zui a ni bawk.