1006/2024-2025

Aizawl, the 28th June, 2024: Mizoram Board of School Education (MBSE) buatsaih Pawl 11 Zirlaibu 4, Physics, Chemistry, Biology leh Mathematics, Mizo tawnga ziak chu vawiin chawhnu dar 2:00 khan School Education Minister Dr. Vanlalthlana'n Directorate of School Education Conference Hall, Treasury Square-ah a tlangzarh.

Khuallian School Education Minister Dr. Vanlalthlana chuan pawl 11 zirlaite tana mahni tawng ngeia Science leh Mathematics subject zir theihna zirlaibu tha tak khawrpuma tlangzarh a ni ta chu lawmawm tiin, a puitlin theih nana ngaihtuahna sengtute fakawm a tih thu a sawi a. India rama bilingual textbook hmang hmasa ber State kan ni thei chu chhuanawm a tih thu sawiin, hemi kawnga School Education Minister hmasa hmalakna fakawm a tih thu a sawi a. NEP 2020 inkaihhruaina duante chu a theihna apiangah a tam thei ang ber kalpui tum a ni tih sawiin, sawkarin thawhhona (convergence) a ngaihpawimawh avangin zirna lam buaipuitute inkarah inpawhtlang taka thawhhona chhawmnun zel a tul dawn a, hemi atan hian tawnhriat ngah zawk zirtirtu leh education department hotute in pawimawh hle dawn a ni, a ti bawk.

School Education Minister chuan tawng pahnih, mahni tawng leh English hmanga zirna kalpui thin te'n thiamna tak tak neiin thil tih an awlsam phah thu sawiin, tuna bilingual textbooks kalpui hian nakin lawkah rah tha a chhuah ngei ka beisei a ni, a ti a. Khawvel ram dangte ruala zirna kawnga hmasawnna hmuh a ni chu lawmawm a tih thu sawiin, kalkhawmte chu hmasawn ve zel tura danglam ngam tur leh infinchhuah a tul huna inthlahrung hauh lo turin a sawm a. Thangtharte tana rohlu tak tur pawl 11 Science leh Mathematics zirlaibu Mizo tawnga buatsaih chuan zirna kawnga bung thar kaina piah lamah hmasawnna a thlen ngei a beisei thu a sawi bawk.

He hun hi MBSE Chairman Pu JH Zoremthanga chuan kaihruaiin kalkhawmte lawmna thu a sawi a. MBSE Secretary Pi Sarah Lalengzami Pachuau hnen atangin report ngaihthlak a ni a. Lehkhabu buatsaih kawnga tha thawktute hnenah chawimawina thilpek hlan a ni a. Lehkhabu tlangzarh takte tobul, buatsaih dan leh nihphungte sawizauna hun Dr. Jonathan Lalrinmawia, Academic Officer, MBSE in a nei a. Pu R. Lalthlamuana, Deputy Secretary, MBSE in lawmthu sawiin hun hman a khar a ni.

National Education Policy (NEP) 2020 in tawng chi hniha zirna kalpui, a bik takin Mathematics leh Science subject-ahte a ngaihpawimawh em avangin MBSE chuan tawng chi hnih (Mizo leh English version) zirlaibu 'bilingual textbooks' siam turin kum 2022 atangin hma a la tan a. Academic session 2023-2024 ah khan Mizoram pumah Science leh Mathematics bikah pawl 9 leh pawl 10-ahte bilingual version textbooks hman tan a ni a, MBSE hnuaia zirlaite chu India rama bilingual textbooks hmang hmasa ber an ni. Tunah hian pawl 12 Science leh Mathematics subject-te Mizo tawnga buatsaih turin buaipui mek a ni bawk. 

Tuna hman mek Science leh Mathematics zirlaibu High School bik tana siam bilingual textbooks-ah hian MBSE chu copyright holder a ni a, English leh Mizo version-te chu lehkhabu pakhata dah kawp a ni a. Higher Secondary School tana siam bilingual textbooks, vawiina tlangzarh takte hi a nih ang anga lehlin ni lovin MBSE syllabus mila ziah a ni a, hemi atan hian NCERT leh publication dangte rawn an ni a. Zirlaibu ziaktute'n syllabus milin an irawm chhuakin mizo tawnga a fiah theih dan tur berin an ziak a. Chapter tin hmaah zirlaiin a tum learning outcome dah niin, zirlai khaikhawmna dah a ni bawk a. Zirlaibu hi a theih chin chinah sawrzim a ni a, Mizo tawnga dah remchang mai lote chu a nih ang anga dah niin zirlaibu tawpah a sawifiahna dah a ni thung.

Zirlaibu ziak tur hian mithiam bik College leh Higher Secondary School-a thawkte thlan chhuah niin, progress report worshop tum 16 lai buatsaih a ni a. A puitlin theih nan Subject Coordinators, Writers, Peer Reviewers leh Proof Readers te'n thahnemngai takin an thawk a. Zirlaibute hi Mizoram chhungah print chhuah niin, ISBN a awm vek a. Physics hi phek 384 a chhah niin Rs 300/- man a ni a. Biology hi phek 406 a chhah Rs 250/- man a ni a, Chemistry hi phek 517 a chhah Rs 300/- man niin, Mathematics hi phek 205 a chhah Rs 250/- man a ni. First edition-ah hian Physics, Biology leh Chemistry-te hi copy 1000 theuh chhut chhuah niin, Mathematics hi copy 500 chhut chhuah a ni a. Heng lehkhabute hi MBSE textbook dealer-te hnenah ngaihven theih a ni.