No.3496/2020-2020

Vawiin (Ni 27.7.2020) khan School Education Minister Pu Lalchhandama Ralte chuan Zokhawthar a tlawh a. Tun hnaia lirnghingin school building leh Biak In a tihchhiatte leh zirna hmun hmate a tlawh.

Minister chuan Zokhawthara amah lo dawngsawngtute chu tun hnaia lirnghing avanga chhiatna an tawhah Mizoram mipui leh sorkarin a tuarpui tak zet a, Biak In hial thiah ngaite chuan mipui thinlung a khawih tak meuh tih a sawi a. Zokhawthar mipuite manganna tuam dam turin sorkarin a tih theih ang ang a ti dawn a ni, a ti.

Minister chuan Zokhawthar-in nasa taka hma a sawn chu lawmawm a tih thu sawiin an hmasawnna chu kum 10 hma lama hnathawh Border trade hlawhtlinnain a rawn hrin chhuah a ni a ti bawk. Pu Lalchhandama Ralte chuan sorkarin hmasawnna hna thawh tak tak tumin kumin kum tir atangin ruahmanna a siam a, Budget session pawh February thlaah neih a ni a, SEDP lamah pawh a tak taka ke pen tuma ruahmanna siam anih laiin Covid -19 in min tibuai ta a, sorkar hmachhawpte chu a chawl leh ta a ni, a ti a. Tunah chuan hripui laka mipui himna tur leh ei leh bar lama tlachham lova mipui kan awmna tur chu ngaih pawimawh a lo ngai leh ta rih a ni a ti bawk. Biak In chhiatna hmun a tlawh hian Minister hian hnatlan nan tiin cheng singkhat chu Kohhran hruaitute hnenah a pe a ni.

Minister-in Zokhawthar a tlawhnaah hian Pu C.Lalmuanpuia MLA, Pu C.Lalnuntlanga Executive Member SHC, Pu Lalhmachhuana SPD Samagra, Pu F.Zosanga Chairman PIGFED leh sorkar mi pawimawh dangten an tawiawm a ni.