1613/2025-2026

26th September, 2025 : September ni 24 leh 25, 2025 khan School Education Minister Dr Vanlalthlana chu Mamit District chhunga school ṭhenkhat tlawhin a feh chhuak a. He hunah hian Govt. Lallen High School, Govt. Phuldungsei High School, Pukzing RMSA Secondary School, Dapchhuah RMSA Secondary, Dapchhuah Adhoc Middle School leh Govt. Dapchhuah Primary School-te a tlawh a ni.

Minister Dr Vanlalthlana chuan zirtirtute chu an intuai hriam reng a ngai a, tun laia thil thleng leh thiamna chhuak thar zirtir zel thei tura textbook pawn lama mi zirtir tel ṭhin turin zirtirtute a chah. Sawrkar school-a zirtirtute chu qualified teacher an nih thu sawiin, zirna mana chhungkaw sum chhuak venpuitu an nih theih thu leh, private school aia zirlaiin an bawh zawk theih nana theih tawp chhuah turin a fuih. Minister chuan zirna hi lehkha zir ringawt a ni lo a, nun kawng inzirtirna pawh a huam vek a. Khawtlang leh ram dam nan leh hma huna rilru hahdam tak neih theihna chu zirna hi a ni a, zirtirtute ṭhahnem ngai taka thawk zel turin a chah a. Khawtlang hruaituten an telpui ṭhin leh khawtlang zirna in te an vei avanga lawm thu sawiin, zirna hi zirtirtute chauh ni lovin, nu leh pa leh khawtlang puma ṭan rualnaah a innghat a ni a ti.

Minister Dr Vanlalthlana chuan MBSE-in academic session thar aṭangin Pawl 9-ah Common Question Exam a buatsaih tur thu sawiin, national level exam JEE leh NEET-ah te Mizo zirlaite an tih ṭhat zawk theihna tur leh zirtirtute ṭang zawka siamtu tur a nih thu a sawi a. Hei bakah hian SCERT chuan elementary school-ah common question (Standardized Assessment for Elementary Schools - SAfES) a buatsaih tur thu a sawi bawk.

School Education Minister hi Samagra Shiksha State Project Director Pu C. Lalthanzira leh Mamit District-a school education official-ten an ṭawiawm a ni.