Vawiin July ni 20, 2018 zirtawpni khan Directorate of Science & Technology (DST) chuan an conference room-ah Mizoram thalai scientist leh zirbing miten an thil zir leh hmuhchhuah khawvel pum huap inkhawmpuia an sawichhuah theihna tura tanpuina dan ‘Science & Technology International Travel Support Scheme’ inhrilhriatna hun leh he scheme hmanga khawvel huap inkhawmpuia kalte hnen atanga report ngaihthlakna hun an hmang.

He hun hi Planning Secretary - Science & Technology changtu Dr. C. Vanlalramsanga’n khuallian niin a hmanpui. Khuallian chuan Mizo thalai scientist leh zirbingmi ten an thil zir leh hmuhchhuah khawvel huapa an phochhuah theihna tura kawng siamsaktu hetiang scheme tha sawrkarin a buatsaih chu lawmawm a tih thu a sawi a. Mithiam bikte tana sawrkar ruahmanna hi chhawr thangkai thei tura thalaiten tan an lak zel a duh thu leh he scheme hian ram hmasawnna tak tak a thlen ngei theih nan Mizo thalaite nasa leh zuala tan la turin a sawm bawk a ni. Dr C Vanlalramsanga chuan Mizo thalai hetianga zinchhuakte chu Mizoram aiawha kal an nih dawn avangin kan ram a thil tha kan chin than leh hausakna te mawi taka phochhuah tum turin a chah a, khawi hmunah pawh tlangnel taka mahni thiamna te zahpui lova phochhuah uar zel turin a fuih bawk.

He hun hi DST-a Chief Scientific Officer Dr. R. K. Lallianthanga’n a kaihruai a, Dr. Aldrin Malsawmtluanga, Scientific Officer-in he sawrkar dan thar ‘Science & Technology International Travel Support Scheme’ hrilhfiahna leh zirtirna hun a hmang a ni.

Mizorama cheng nghet scientist leh mithiam bik, khawvel huap inkhawmpuiliana an thil zirbing leh hmuhchhuah sawichhuak tura tlingte bakah khawvel huap inkhawmpuia thusawi tura sawmbik leh inkhawm kaihruai tura sawmbik ten he scheme atang hian tanpuina an dawng thei a. Khawvel pum huap University tha thlanchhuaha thusawi turte phei chu duhsak bik an ni dawn a ni.

He scheme atanga tanpuina dawnga khawvel pum huap inkhawmpuia tel, Pachhunga University-a Zoology zirtirtu - Associate Professor Dr. H. Lalthanzara leh Disaster Management & Rehabilitation Department-a Assistant Director Dr. Lalrokima Chenkual ten report an pe a. Dr. H. Lalthanzara’n Mizoram atanga changpat chithar a hmuhchhuah chanchin khawvela changpat chanchin zirmite inhmuhkhawmna International Symposium on Earthworm Ecology vawi 11-na leh International Earthworm Congress hmasaber ni bawk June ni 24-29, 2018 chhunga Shanghai, China-a a puanzar thu a sawi a. Dr. Lalrokima Chenkual-in March ni 15-16 March, 2018 chhunga International Conference on Disaster and Emergency Management vawi 20-na London, United Kingdom-a a thusawi (paper present) chungchang a sawi bawk. Hei bakah hian he scheme atangin Pachhunga University College-a Assistant Professor Dr. Laldinpuia’n November ni 24-28, 2018 hian Cairo, Egypt-ah paper a present dawn bawk a ni.

 He hunah hian sawrkar mi pawimawh engemaw zat leh Mizoram a science pawl hrang hrang Mizoram Science Society, Mizo Academy of Sciences, Science Teachers’ Association Mizoram, Mizoram Mathematics Society, BIOCONE atangte leh he scheme hmangtangkai thei tur College leh university atangin mithim thahnem tak an tel a ni.