Vawiin khan I&PR Auditorium ah Directorate of Science & Technology buatsaihin Mizoram Sicence lama zirbingna neih dan kalhmang inkawhhmuhna - Sensitization Workshop for Development of Local Specific neih a ni.
He workshop hi Dr. R.K. Lallianthanga, Principal Scientific Officer in a kaihruai a. Ram hmasawnna tur leh intodelh tur chuan Science lama zir bingna neih a ngai a. Hetiang lama hmalak dan tur leh Project siam dan tur inkawhhmuhna remchang neih a ni thei chu lawmawm a tih thu a sawi a.
Chief Scientific Officer Dr. Vanlalzara’n workshop neih a nih chhan leh Science & Technology hmalakna hrang hrang a sawi a. Science leh Technology a hmalakna hrang hrangte hian mipui hmasawnna tur hi a tum ber a ni a, a bik in thingtlang lam chawikanna tur leh hmasawnna tur hi a tum bulpui ber a ni a ti a. Central a Department of Science & Technology hnuaiah hian Project chi hrang hrang kalpui mek a ni. Chung zingah chuan Bio-fuels te, bawlhhlawh sawngbawlna te, chhehvel enkawl leh vawn himna te, energy hman tangkaina te, tui thianghlim neih theih dan te leh ei leh bara intodelhna lam hawi te a ni a. He lama Mizoramin hma a lak theih dan tur inkawhhmuhna buatsaih a ni theih hi kan tangkaipui ngei a beisei thu a sawi.
He workhshop a Resource Person Dr. Tarun C. Bora, Chief Scientist and Head Biotechnology Division, North East Institute of Science & Technology (NEIST) chuan leilung hausakna chi hrang hrang te hman tangkai dan tur leh heng hmanga zir bingna kalpui dan tur leh Project siam dan tur a sawi a. Mizoramah pawh hetiang lama hmalak dan tur kawng tam tak a awm thu a sawi a ni. Resource Person dang Dr. P.R. Bhatacharya, Chief Scientist and Head, Agro-Technology Division, NEIST pawhin power presentation hmangin Mizoram a leilung hausakna chi hrang hrang awmte hmang tangkai a, hmasawnna tluantling nei tura zir bingna neih dan tur leh Project siam dan tur a tarlang bawk.
Chawhnu lam hi Dr. R. Kapthuama, Director (Retd.) AH & Vety leh Member, Mizoram Council of Science & Technology in a kaihruai a. Biotechnology leh Agro-Forestry lama zir bingna neih dan tur leh Project siam dan turte sawi ho a ni. He workshop ah hian MZU atangin Professor te leh Research Scholar te, PUC atangin Assistant Professor te, Mizoram Science Society aiawhte, MIPOGRASS aiawh te, AYUSH atanga mithiamte, BIOCONE aiawhte, MIRSAC Scientist te bakah Directorate of Science & Technology a officer te an tel a ni.
