Vawiin khan Kolasib DC Conference Hall-ah Scientific Advisory Meeting, Director of Agriculture, Research & Education buatsaihin neih a ni a. He hun hi Pu C. Lalniliana, Director, Agriculture, R & E chuan a hmanpui a ni.

Thuchah sawiin Pu C.Lalniliana chuan tuna Scientific Advisory Committee chu Mizoramin buh leh thlai chin kawnga kawng tam taka hma a sawnna tur duangtu a nih avangin a pawimawh hle a ni, a ti a. Kolasib District chhunga Loneitu leh thlai chingtu tamtak ten hlawk zawka an hnathawhte an chhawr theih nana kawng kawhkmuhtu KVK tena ruahmanna an siamte pawmpuina hun a nih avangin Work Plan an siamte hi chik taka kan thlir tlan a tul a ni, a ti. Hmun danga thlai tha duh tak kha kan ram leilungin a mil ve ngawt lo thei a. Chung zawng zawng lo enchhina min kawhhmuhtute chu KVK mithiamte hi an ni a. Tunlai chhanah Scientific test leh Proof tello chuan duh ang apiang chin ngawt hi a him tawh lo a ni, Pu Lalniliana chuan a ti a ni.

SAC Meeting-ah hian Kolasib KVK , Farm Science Centre-a mithiam paruk ten subject hrang hrang hmanga buh leh thlai te ching tura hlawk zawka hma lak dan an lo en chhin tawh dan leh an hmachhawp te, leilung puahchah tura tihtur.,.damdawi leh hnim hmanga lei tih that dan te, lei thur enkawl dan te, Mizoram mipui te tana ran vulh uar tura hmalak dan tur leh taksa tana hrisel leh hlawk zawka ran vulh leh enkawl dan anlo zir chian tawhte tlangzarhin hmachhawp tamtak an neihte an sawi bawk a ni.

Pu Lalrosanga Khiangte, Programme Coordinator KVK, Kolasib chuan KVK in anlo thawh tawh thil chi hrang hrang sawiin tun dinhmunah Ar chi tha Giriraja chu uar taka ran vulhtute hnena an vulhtir thu leh hei hi zawngchhang tlak an ti tih a sawi a. Vanaraja leh Turkey, Mizoten Sai Ar tia kan hriat chu an hmachhawp zingah a tel tih a sawilang bawk a ni.