Tun hnaia pension-a chhuak tur Secretary, I&PR Pu Nghaklianmawia chu vawiin chhun khan I&PR Department Officers leh MJA Office Bearers-ten thlahna hun hmangin Director, I&PR Office-ah hun tawite an hmang.

 

 

Inthlahna hunah hian Director, I&PR Pu Jim K.Chozah chuan hun reilote chhunga Secretary, I&PR a chelh lai hian Department tan thil hnutchhiah tha tak a nei a ni tiin chanchinbumite tana hamthatna Journalist Welfare Fund ngaihtuahtu tur Mizoram Journalist Welfare Society chu dinfel thawkhat ani a ti a, Department-in a hnathawh an thlakhlelh em em laia thlah a lo hun ta mai chu Department tan chuan channa lian tak a tling ang tiin a hun kalzel turah duhsakna a hlan a ni.

Pu Nghaklianmawia pawhin I&PR Department hun reilote a enkawl chhunga a thil hmuh sawiin Department tangrual leh thawhpui nuam tak an ni a ti a, a hun tawite chhungin he Department tan sawi tham engmah thawh a nei lo chunga hetianga an chawimawia ui taka an thlah chu a lawmthu a sawi a ni.

Pu Nghaklianmawia, MCS hi 1967 khan Assam Shillong-ah LDC hnate thawkin bul a tan a, Mizoram Sorkar hnuaiah High School zirtirtu leh Headmaster hnate thawkin 1977 khan Mizoram Civil Service 2nd Batch a zawm a, Mizoram Sorkar hnuaiah hna chi hrang hrang 17 lai a thawh hnuah tun February thla tawp hian Secretary, I&PR, Horticulture, Sports & Youth Services leh Disaster Management & Rehabilitation atangin a pension dawn a ni.