Vawiin Dec 22, 2009 hian Aizawl Bawrhsap Office-ah Security Committee anb thukhawm a, Aizawl Bawrhsap Pu C. Thanchhuma a tang hle a; Krismas leh kumthar vuakveta halpuah lam chi hal lo tur leh zu rui venna kawngah nasa takin tan a la mek a; Aizawl khawpui chhung hi Zone 10-a thenin, Magistrate te fang kuala, YMA/VDP te duty te thlamuana, harsatna awm apiang Magistrate te hrilh zung zung theihna tura buatsaih dan a sawi.
Aizawl SP Pu Lalbiakthanga Khiangte pawh a tang hle a, December thla chanve atang khan zantin police 70 vel tlaivara duty-in zu zuar l;eh buaina siam te an awm lohna turin theih tawp an chhuah thu leh tunah phei chuan IR 140 velin an belh thar dawn a ni tih a sawi a. Tun Krismas leh kum thar vuakveta mi sual laka khawtlang a him zawkna turin Bethlehem Veng, Ramrikawn, leh Melriat ah te Police Beat Office hawn thar a ni tih a sawi bawk. Veng hrang hrang atanga harsatna tawkte chuan Aizawl Police Station hrang hrang- te bakah heng Beat Office-ah te hian thlen theih reng a ni tih mipuiten hriat a tha awm e.
Aizawl Bawrhsap Pu C.Thanchhuma chuan Magistrate te hnena thuchah tawi sawiin, kan mite an himna tur leh hlim leh lawm taka heng hunpui- Krismas leh Kumthar te kan hman theihna turah hian Magistrate te chu mipui thlamuantu ni tura tan la tura chahin, mite zingah intih- Magistrate lutuk pawh a tul lova, mawi taka nun a pawimawh tih sawiin, Magistrate te chu vantlang hriata zu leh ruih theih thila insum tlat tur leh, eng hun pawha mamawhtuten an pan a, an koh hun apiangin inpeih renga awm turin a ngen a ni.
Mahni duty theuh thahnemngai taka hlen chhuak tura inchahin Krismas duhsakna inhlan chungin Committee an tin ta a ni.
