490/2022-2023
Aizawl, 13th May, 2022 : Vawiin khan Human Resource Development Board Vice Chairman Pu L. Thangmawia chuan vohbik (bengngawng & tawngtheilo) te tana Ephatha Society of Mizoram in an lo din Ephatha Special School, Kulikawn ami a tlawh a. Health & Family Welfare Board Vice Chairman Dr Z.R.Thiamsanga leh Aizawl South II bialtu MLA Pu Lalchhuanthanga ten tawiawmin vohbik naupangten kut tawng (sign language) hmangin ‘Ro Min Rel Sak Ang Che’ tih hlain an lo dawng sawng a ni.

HRD Board Vice Chairman Pu L. Thangmawia chuan Ephatha Society hmalakna chu fakin, harsatna tam tak paltlanga mi thahnemngai ten naupang bengngawng leh tawngtheilote tana sum leh pai, tha leh zung seng a, rim taka an lo thawk chu lawmawm a tih thu a sawi a. Sawrkar laipui leh Mizoram sawrkar pawhin vohbikte hi a ngaih pawimawh thu leh sikulah pawh Special Educator te pawh dah an nih thin thu te, mahse sikul pangngaia kal chungchangah an dinhmun azirin harsatna tam tak a awm thu a sawi. A bik takin mitdel te, bengngawng leh tawngtheilo kut tawng (sign language) hmanga biak ngaite tan a buaithlak zual a ni a ti a. An hun kal zel tur ngaihtuah changin an lainatawm hle a, rual an pawl theih nan leh tunlai khawvel mila an nun an hman theih nan ziak leh chhiar mai bakah engemaw chen lehkha an zir hi a tangkai hle dawn avangin vohbik hetiang zatin lehkha zir an phur em em hian a rilru a khawih takzet a ni a ti. Sawrkar lam atang pawhin puih theihna awm apiangah puih zel an nih dawn thu leh danin a phal chuan Lumpsum GIA kum tin an hmuh ve theih nana thuneitu sang zawkte hnena a thlensak tur thu a hrilh bawk. Pu Thangmawia chuan Ephatha Special School tanpui nan SEDP atangin School Education Minister Pu Lalchhandama Ralte chuan Rs 2,00,000/- a ruahman sak thu Ephatha Society of Mizoram te hi a hrilh a. HRD Board Vice Chairman Pu L.Thangmawia hian Ephatha Special School atan Computer Set 1 leh Printer 1 a pe nghal bawk a ni.

Ephatha Society of Mizoram (ESOM) hruaitute chuan sikul tlawhtute chu an pawl din chhan leh an hmalaknate an lo hrihfiah a, naupang bengngawng leh tawngtheilote tana sign language hmanga zirtirna pek a ngaih avangin, an naupan deuh laiin Gilead Special School-ah leh school dangahte kal tir mahse an zir chhoh zelnaah harsatna eng eng emaw a awm thin a. Zirna sang zawk heng vohbik ten an zir chhoh zel theih nan ESOM hi ni 28.02.2012 a din a nih thu te, Society-in sum leh pai hmuhna hranpa a neih loh avanga he school dinna tur kal kawng pawh a bumboh thu te, vanneihthlak taka Rev. S. Lalmuana’n a thlawna Vaivakawn-a a building a luah tir thu te, kum 2016, April thlaa sikul hi hawn tan a nih thute an lo hrilh a. ESOM hotute chuan heng vohbik naupangte tana hma an laknaah mi thahnem ngaite atanga tanpuina an dawn te, Sawrkar leh Synod partnership atanga tanpuina an dawn te leh Aizawl West-II bialtu MLA a nih laia Pu Lalruatkima’n MLA fund a lo pek tawhnaah leh a tul apianga lo buaipui thin avangin lawmthu an sawi a. School building an luah lai chu luah chhunzawm reng a lo remchan tawh loh avangin an buai hle tih sawiin Chief Minister Pu Zoramthanga leh School Education Minister Pu Lalchhandama Ralte te hnenah an harsatna an thlen thu te, Mizoram sawrkarin an thu thlente lo ngaih pawimawh saka Kulikawna RMSA Building chu Ephatha Special School atana luah hawh an phal sak avang leh Kulikawn khawtlang hruaituten tha taka an lo dawnsawn avangin an lawm hle a ni tih an lo sawi a ni. Ephatha Special School, Kulikawn-ah hian Class I–VIII awmin zirlai 16 an awm mek a, lawmman tlemte dawngin zirtirtu pali (4), sign language thiam vek ten naupang hi an zirtir mek a ni.

Vawiin Ephatha Special School a tlawhnaah HRD Board Vice Chairman hi Pi Mina Zoliani, Dy Director, I&PR, Pu C.Lalthanzira, Addl SPD, Samagra Shiksha, Pi G. Lalhmingthangi, Asst. Commissioner, Person with Disability (PwD) leh Kulikawn khawtlang hruaituten an tawiawm bawk a ni.