SEDP Man Power Development Board Vice Chairman Dr. Vanlaltanpuia, MLA chuan vawiin khan Labour Employment, Skill Development and Entrepreneurship Department (LESDED) buatsaih ni hnih awh tur Job/Skill Fair cum Career Guidance Programme chu Dawrpui Multipurpose Centre ah hawngin, khuallian a ni a. Pu Krishna Mohan Uppu, Special Secretary, LESDED chu khualzahawm a niin, Pu Lalhmunsanga Hnamte, Director, LESDED chuan he hun hi a kaihruai a ni.

Khuallian Dr. Vanlaltanpuia chuan Mizoram hmasawnna a nih ngei na tura lokal school hrang hrang atanga zirlai lokal te hnenah leh LESDED hnenah lawmthu a sawi a. Mizoram Sawrkar chuan Man Power Development hi a ngaih pawimawh ber tur te zing a mi a ni, a ti a. Vawiina zirlai leh thalai lokal khawm te hi mahni kut ke a ding thei tura tun atanga ngaihtuahna seng turin leh, thiamna kan neihte tih pun (professionalize) a nih thei nana tan la zual turin leh tangkai taka career guidance te pawh hmang turin a chah a ni. Mihringah thiamna vawikhat pek a nih tawh chuan, dam chhung a daih tawh a, ram hmasawn nan chungchu  rahbi pakhat a ni, tiin a sawi a. India ram zirna sang IIT, IIM leh Institution danga lut thei tura lehkha zir uar hi zirlaite mawhphurhna a ni a, Mizoram Youth Commission pawh nasa taka tih chak leh zual a ni ang, a ti bawk a ni.

Khualzahawm Pu Krishna Mohan Uppu pawhin thu sawiin, sawrkar kaltlanga fair cum career guidance buatsaih a nih chu lawm awm, a ti a. Zirlai te chu hun hmang tha turin leh tha hnem ngai taka lehkha zir turin leh mahni duhzawng leh mahni tui zawnga hlawhtling thei tura tun atanga hmalakna nei turin a fuih bawk a ni. 

He hunah hian Career Counselling Mizoram Youth Commission leh Eastern Solution & Consultancy Services ten zirlai leh thalai kalkhawm hnenah an pe a, stall hrang hrangah zirlai leh thalai te tana tangkai tur thil te pho chhuah leh tar lan a ni bawk a ni.