No.2692/2020-2020
Vawiin chawhma khan Pu K Lalrinliana, Fisheries Department Minister chuan Dumlui, Kolasib-a Pilot Project ang a kalpui lai Chakai Farm a tlawh a, Fisheries Department hnuaia Blue Revolution kaltlanga sangha dil siam thenkhatte a tlawh bawk.

Minister Pu K Lalrinliana chuan, Chakai hi mizo te chawhmeh ngainat tak a ni a, amaherawh chu thianghlim leh mumal tak a farm anga kalpui a la nih ngai loh avangin enchhin nan Pilot project anga kalpui hi a tul a ni, a ti a, Dumlui a enchhinna ah hian chakai 48,000 vulh theihna hmun tur siam niin hei hi hlawhtling tak a kalpui a nih chuan SEDP hnuaiah zau zawk a kalpui tum a ni ang, a ti. Fisheries Minister chuan Blue Revolution hnuaia hamthatna dawngte tlawhin, "Tihtakna nen hlawhtlin tuma beitute chu Sawrkar hian a pui duh reng a, an hlawhtlinna hi a lawmpui tak zet thin a ni," a ti bawk.

Dumlui, Kolasib-a Pilot project on Crab Culture hi March, 2020 atanga enchhinna kalpui tan a ni a, chakai chi tha lak khawm a, chi thlah tur a dah khawm tum a ni a, COVID-19 hripui leng vanga inkharkhipna kalpui a nih tak avangin ruahman lawk anga kalpui thei ni rihlo mahse, chakai engemaw zah chu chi thlah tur a lak khawm tawh a ni.
Minister hian Dumlui a tlawh hnu hian Kolasib Project veng a DCSO office leh supply kudam sak lai a endik nghal bawk.

Fisheries Minister hi Pi Lalparmawii, DFDO, Pu ST Lalhmingmawia, DLAO leh Pu Hmingthanzuala, DIPRO, Kolasib ten an tawiawm a ni.