Vawiin khan Secretariat Conference Hall, New Secretariat Complex-ah Rural Development Minister Pu R.Lalzirliana hovin State Employment Guarantee Council (SEGC) meeting neih a ni.

SEGC meeting hi Mahatma Gandhi National Rural Employment Guarantee Act (MGNREGA) tana neih a ni a. Kum hmasa lama an thil rel tawhte thlirletna an neih bakah kum 2015-2016 chhunga MGNREGA hnuaia hnathawh tur leh Labour Budget chungchang sawihona leh thlirlawkna an nei a ni.

Kum 2014-2015 chhungin Mizoram chuan MGNREGA hnuaiah cheng nuai 9941.33 a hmu tawh a. State in a doletna tur cheng nuai 122.504 hmuh a ni tawh bawk. Mipuiiin inhlawhna tur tam zawk an neih theih beiseina avangin kum 2015-2016 chhung hian MGNREGA sum chu mipui inhlawhna tur wage atan 90% leh material component atan 10% dah ni se tiin Council chuan a rel a. Hei hi MGNREGA Empowered Committee hnenah pawmpui tura thawn a ni ang.

Sorkar laipui duhdan angin MGNREGA leh scheme hrang hrang kaihkawp (convergence) chu kalpui mek a ni a. Kum kalta chhung khan Department pali - Soil & Water Conservation Department, Fisheries Department, Horticulture Department leh Sericulture Department-te nen convergence hi kalpui a lo ni tawh a. 2015-2016 atan Department 10 – PWD, PHE, ICDS, Forest, Agriculture, AH &Vety, Sericulture, Soil & Water Conservation, Fisheries leh Horticulture Department te nen convergence hi kalpui tum a ni a. Hei hian nasa zawkin thingtlang loneitute tan tangkai zawka MGNREGA an hman beisei a ni.

SEGC meeting ah hian Parliamentary Secretary Lt.Col.ZS Zuala bakah Secretary te, DC te, Project Director-te leh sorkar mi pawimawh dangte an tel a ni.