Mizoram State Rural Livelihoods Mission (MzSRLM), Rural Development Department hnuaia scheme pakhat Aajeevika Grameen Express Yojana (AGEY) hnuaiah lirthei 18 RD Block pathum Bilkhawthlir, Serchhip leh Tipa a Self Help Group (SHG) te hman tur in vawiin khan semchhuah a ni a, Pu R.Lalzirliana, Rural Development Department Minister in a vailiam a ni. Vawiin hun hmanah hian Pu Lalsawta, Finance Minister leh Pu K.Lalrinthanga, Serlui bialtu MLA te pawh an tel a ni
Lirthei hlanna leh vailiam inkhawmah hian thusawiin Pu R.Lalzirliana chuan retheihna ata penchhuaka mahni thiamthil leh theihzawng thawka eizawngtura duan self help group te’n an eizawnna leh an hmalakna pui thei tur a lirthei an dawng chu a lawmpui thu sawiin, lirthei dawng thei tura thlanchhuah self help group te chu uluk tak leh fimkhur taka an lirthei dawn te hmang turin a chah a. Sum lakluh dan leh a hman kawngah rinawm tur leh an lirthei dawn te innghirngho nan nilo a, inlungrual taka hma an lak chhunzawmna a nih ngei a beisei thu a sawiin, tluang taka an hman theih nan duhsakna a hlan a. Self Help Group te hmasawn zel tur a fuihin, teirei peihna leh taimakna nena hmala chho zel turin a fuih a ni.
He lirthei hlanna leh vailiam inkhawm hi Pu Lalhmingthanga, Secretary Rural Development in a kaihruai a. Pi H.Lalchhandami, Chief Executive Officer, MzSRLM in lirthei semchhuah chungchang leh AGEY hnuaia hmalakna te a tarlang a. Vawiina lirthei semchhuah hi Bolero Pick up 13 leh Sumo 5 a ni.
AGEY in a tum ber chu thingtlang a awm SHG member te sum lakluhna hmanrua tur leh khaw mipui ten tangkai taka bazar, zirna in, leh damdawiin kalna atana hmantur leh khawchheh vel ei leh bar hmasawnna thlen theitu tur lirthei ruahmansak a ni. He programme hnuaiah hian MzSRLM atanga Village Organisation (VO) te hnena sum pek Community Investment Fund (CIF) hmangin SHG-te lirthei lei sak an ni a, pung awm lovin SHG te hian lirthei man hi VO-ah kum ruk chhungin an rul leh ang. SHG ten an khaw mamawh ang zawng leh lirthei an duh ang zawng an thlang a, lirthei thlan theih te Rickshaw, 3-wheeler, 4-wheeler te a ni a. Lirthei pakhat lei nan VO-te CIF atangin Rs.6.50lakhs hman theih niin, a aia to an lei duh chuan sum puk belh phalsak an ni. Tun dinhmunah hian MzSRLM hnuaiah SHG 2980 leh VO 157 din tawh niin, District paruk hnuaiah RD Block 17 ah MzSRLM hian hna chak takin a kalpui mek a ni.
